Өңірде өткен тәулікте коронавирус тіркелген жоқ. Жалпы облыс тұрғындары арасында COVID-19 инфекциясымен аурушаңдық деңгейі бәсеңдеп келеді. Сәуір айында індет тек 4 адамнан анықталған. Бұл туралы бүгін өңірлік коммуникациялар қызметі алаңында өткен брифингте облыстық санитарлық-эпидемиологиялық бақылау департаменті басшысының орынбасары Гүлбану Дәулетова мен облыстық денсаулық сақтау басқармасы басшысының орынбасары Бекболат Ізбасаров мәлімдеді. Жыл басынан бері 9 мыңға жуық ақтөбеліктің ПТР тесті оң нәтиже көрсеткен. Оның ішінде қаңтар айында - 7462 адам, ақпанда - 1454 адам, наурыз айында - 27 адам коронавируспен ауырған. Ал, сәуір айында індет тек 4 адамнан анықталған. Жалпы пандемия басталғалы бері өңірде 43 906 адам коронавирусқа шалдыққан. Бүгінгі таңда індет жұқтырғандардың 98%-ы ауруынан айықты. Жыл басынан бері карантин талаптарын бұзғандарға қатысты 22 әкімшілік іс қозғалып, жалпы сомасы 1 млн 10 мың теңге айыппұл салынды. "Ashyq" жобасы бойынша "қызыл" мәртебемен 161 адам, "сары" статуспен 33 адам анықталды, 8 адам әкімшілік жауапкершілікке тартылып, 367 мың теңге айыппұл төледі. Өңірде эпидемиологиялық ахуалдың тұрақтануына байланысты қазіргі таңда тек бір ғана ковидтік стационар жұмыс істеп тұр. Онда үш адам коронавирусқа қарсы ем алып жатыр. Денсаулық сақтау саласының мамандары, сондай-ақ, көктем-жаз мезгілінде тұрғындар арасында тамақтан улану қаупі артатынын ескертті. Сондықтан, ақтөбеліктерге тамақтан уланудың алдын алу жөнінде бірқатар кеңес берді. Департамент өкілі соңғы уақытта ақтөбеліктер әлеуметтік желілер арқылы үй жағдайында дайындалған тағамдарға тапсырыс беруді әдетке айналдырғанын атап өтті. Себебі, бұл ыңғайлы әрі мейрамханаларға тапсырыс бергеннен әлдеқайда арзан. Алайда, мұндай тағамдардың қауіпсіз екеніне ешқандай кепілдік жоқ. Сондықтан, тұрғындар мұның алдын алғаны жөн. Ал, егер тағамнан уланып қалған жағдайда дереу дәрігерге жүгіну керек, өз бетінше ем қабылдамаған абзал. Атап өтейік, 2021 жылы және осы жыл басынан бері өңірде жаппай тағамнан улану деректері тіркелген жоқ.