Адамдар дәлізге үлкен дәретке отырып кетеді. Сәтпаев көшесіндегі №5-үйдің тұрғындары бір-бірін аңдып шаршаған. Жатақханада ыстық су жоқ. Салқын су да тапшы. Сәтпаев көшесіндегі №5-ші үй қазақ-түрік лицейінің дәл артында тұр. Қаланың қақ ортасы. Сондай-ақ, үй көше жиегінде орналасқан. Яғни, оған ешкімнің назар аудармауы мүмкін емес. 1979-80-ші жылдары тұрғызылған 5 қатарлы жатақхананың бүгінге дейін бір тасы да жаңартылмаған. Картадан құрастырылған үй секілді қирағалы тұр. 156 бөлмеде ылғи зейнеткерлер, мүгедектер, қаражаты тапшы балалы-шағалы жас отбасылар тұрады. Көп бөлме жалға беріліп қойған. Жатақхана үшін байырғы тұрғындарының ғана басы ауырады. Тұрғындарының бірі білсе, бірі бұдан хабарсыз. Бірақ, жатақхана әуел баста ыстық суға қосулы. Тек уақыт өте келе құбырлары тозып, тесілген. Жөндеу үшін жертөлеге түсу керек. Ал жертөлені толтырған нәжіс суы бет қаратпайды. Ең оңтайлы шешімі үйге ыстық су беруді тоқтату ғана болған. Енді "Трансэнерго" мекемесі биыл жатақхананы жылудан да ажыратпақ. Жатақхананың шаруашылығын қолына алатын адам жоқ. Үй басқарушысы мына қарама-қарсы жатақханада тұрады. Ол өзінің жатақханасын осыдан 2-3 жыл бұрын терможаңғырту бағдарламасы бойынша жөндетіп алды,- дейді тұрғындар. "Біреудің жоғын біреу түйе мініп іздейді " деген осыдан шығады. Бұл топ дәл мына үйдей жатақхананы іші-сыртына дейін қаптап беруді сұрамайды. Шатырымыз бен жертөлеміз ретке келтірілсе болғаны деп отыр. Алайда биыл қалада көп қабатты тұрғын үйлерді қайта жарақтандыруға ақша бөлінбеген.