Бүгін облыстағы денсаулық сақтау саласында былтыр атқарылған жұмыстар қорытындыланды. Есеп беру жиынына емдеу мекемелерінің басшылары түгел қатысты. Әсет Қалиевтің сөзінше, аймақтағы денсаулық сақтау саласында жетістіктер де, кемшіліктер де көп. Жалпы науқастар арасында өлім көрсеткіші артқан. Облыстағы басты мәселелердің бірі осы. 2017 жылмен салыстырғанда былтыр адам өлімі 0,6 пайызға өскен. Жүрек-қан тамырлары, өкпе-тыныс, асқазан ауруларына шалдыққан сырқаттар арасында өлім көп тіркелген. Облыста қандай да бір жұқпалы дертке қарсы екпе алмаған 2600-ге тарта бала бар. Ата-аналары рұқсат бермей отыр. Бала туу көрсеткіші артқанымен, 1 жасқа дейінгі сәби өлімі де көбейіп тұр. Былтыр Қобда, Мұғалжар, Байғанин аудандарында нәресте өлімі көп тіркелген. Бірнеше себебі бар, дейді аймақтың бас дәрігері. Болашақ аналар уақытында медициналық тексеруден өтпейді, емделмейді. Шараналардың шетінеу жағдайларының 20 пайызға жуығы туа бітті ақаулардан болады. Құрсақ ішіндегі инфекциялардың салдары да бар. Тіпті, ультра-дыбыстық зерттеу кезінде диагноз дұрыс анықталмайтын жағдайлар да болады. Ал, туберкулез ауруы былтыр Әйтеке би, Мұғалжар, Қарғалы аудандарында облыстық көрсеткіштен асқан. Облыс әкімі Бердібек Сапарбаевтың сөзінше, денсаулық сақтау саласында кемшілік басым. Науқастарға дөрекі сөйлейтін медицина қызметкерлері көп. Облыс тұрғындарынан денсаулық сақтау басқармасына былтыр 470-тен көп арыз-шағым түскен. Жедел жәрдем қызметінің жұмысына қатысты шағымдар көп. Сондай-ақ, 2018 жылы Мәртөк, Мұғалжар аудандық аурухананаларының, жедел жәрдем бекеті мен Ақтөбе медициналық орталығы балалар стационарының бас дәрігерлері жұмыстарынан босатылды. Жауапкершілікті сезінбей, жұмысын дұрыс атқармаған. Медициналық қызмет сапасын жақсарту үшін өңірге шетелдік мамандарды көптеп тарту керек. Олар үшін алда пәтер мәселесі шешілетін болады. Былтыр ақтөбелік және шетелдік дәрігерлердің қатысуымен жүрек, тізе буынын ауыстыру, жамбас-сан буыны, нейрохирургиялық, бауыр, бүйрек ауыстыру бойынша 300-ден астам ота жасалған. Биыл 20 бауыр, 5 бүйрек ауыстыру оталарына министрліктен қаржы сұралған.