Астанадағы бес баланың өлімі бүкіл елде өрт қауіпсіздігін қамтамасыз етуге түрткі болды. Ақтөбеде де төтенше жағдайлар департаментінің қызметкерлері рейд бастап кетті. Кешеден бері мамандар саяжайларды аралап жүр. Себебі көбі үйлерін от жағып жылытып отыр. Бүгін олар қалалық сүт зауыты ауданындағы "Ромашка" бау-бақша ұжымына барды. Осы жылдың қаңтар айында облыс аумағында 33 өрт оқиғасы тіркелген. 13 тұрғын үйден өрт шыққан. Қаладағы бау-бақша ұжымындағы үйлердің басым бөлігіне әлі көгілдір отын кірмеген. Тұрғындар үйін пешпен жылытады. Мұндай жеке үйлерден өрт лап ете қалуы лезде. Сондықтан олар қауіпсіздік шараларын қатаң қадағалауы қажет. "Тұрғын үйлердегі өрт көбіне тазартылмаған мұржаның салдарынан болады",- дейді мамандар. Бүгін төтенше жағдайлар департаментінің қызметкерлері "Ромашка" бау-бақша ұжымындағы үйлерін отпен жылытатын отбасыларға қауіпсіздік ережелерін түсіндіріп, парақша таратты. Мамандардың бұл еңбегіне алғыс айтқан тұрғындармен қатар оларға құлақ аспағандар да кездесті. Немқұрайдылық танытқан мына тұрғын тіпті қызметкерлерді балағаттап жіберді. Мамандар мұндайдың талайын бастарынан өткерген. Сол себепті жылу маусымы біткенше ескерту шараларын жалғастырып, от жағатын тұрғын үйлерді аралай бермек. Олар қала тұрғындарын сақ болуға шақырды. Пешті және мұржаны үнемі тазалап, пеш үстіне орнатылған плитаның айналасын ашық қалдыру қажет. Сонымен қатар, тұрғындарға балаларын үйде қараусыз қалдырмау, оларға шырпы бермеу қатаң ескертілді. "Ромашка" бау-бақша ұжымының біраз үйін аралаған мамандар жабық тұрған үйлерге қауіпсіздік ережелері жазылған парақшаларды есіктеріне іліп кетті.