Қаланың ортасындағы өртенген үйде әлі тексеру жұмыстары жүріп жатыр. Жалын шыққан бұл пәтер өрт сөндіру қызметі жетемін дегенше 40 минуттың ішінде түгелімен жанып кеткен. Пәтер иелері өрттен кейін көрінбеген. Көршілерімен тілдеспек болып жапсарлас есікті қақтық. Бұл үйдегілер де тума-туыстарын жағалап жүрсе керек, ешкім есікті ашпады. Тек қана қарсы жақтан кішкентай тұрғын есігін ашты. 4-ші қабатта тұратын Александр Ким қазір бала-шағасымен апасының үйін паналап жүр. Алапат өрттен оның екі бөлмесі қатты зардап шеккен. Үйден ыстың иісі мүңкіп тұр. Отағасы әзірге жұмысын тастап, пәтеріне күнде келеді. Апталап туысқанды паналаған ыңғайсыз, жөндеу жұмыстары әзір басталмаса уақытша пәтер жалдауға тура келеді дейді ол.
Көршісінің сөзін Аяш Сатиева жалғады. Үйінде 89 жастағы қария тұратын келіншек пәтер жағалап жүре алмайтынын айтты. Салқын түспей қылтималарды уақытында ауыстырып бергеніне риза. Одан кейін бір апта өтсе де ешкім төбе көрсетпепті. Қақаған қыста далада қаламыз ба деп қорқып отыр. Тұрғындардың алаңдауының жөні бар. Өртенген үйге қатысты тексеру жұмыстары әлі жүріп жатыр. Қызыл жалын төтенше жағдай деп танылмаса, қазынадан шығынды өтеуге қаржы бөлінбейді. Арнайы комиссия мүшелерінің құрамына Астана, Алматы қалаларынан мамандар келіп қосылды. Қорытындысы 1 айдың ішінде белгілі болуы тиіс. Естеріңізге сала кетейік, өткен аптада 10 қабатты үйде болған алапат өрттен 1 пәтер түгел жанып кетті. Тағы 30-ы бүлінді. Өрт болған күннің ертесіне жедел қарқынмен көше жақ беттегі қылтималар түгел боялды. Көп қабатты үйге газ, су, жарық қосылған. Зардап шеккен пәтерлерді еріктілер тазартып болды. Бұл үйдің сырт келбеті қала сәулетіне сәйкес 2013 жылы сәнделген болатын.