52 өзбек азаматының өліміне қатысты сот отырысы бүгін қайта жалғасты. Бұл жолы өртенген автобусты жалға алушы "Азия Транзит Сервис" компаниясының құрылтайшысы Нұрлыбек Телепбаев пен механик Бахадир Бердібаевтардың қорғаушысы Егемқұл Жүнісовке сөз берілді. Адвокат "әп" дегеннен мемлекеттік айыптаушы тарапты сынның астына алды. Қорғауындағы механик Бахадир Бердібаевқа тағылған айып ішінде "Өзінің функционалдық міндеттеріне сәйкес көлік құралдарының техникалық жай-күйіне жауапты тұлға бола тұра лауазымдық нұсқаулықта көрсетілген 2-3 тармақтардағы талаптарды бұзды" деген тұсы бар. Қылмысқа адамның қатысы бар-жоғына объектив баға беру үшін Егемқұл Жүнісов айыптау хаттамасының әр сөзін талдады. Ол рейске жарақсыз автобус жіберілген болса жолда бірнеше мәрте тоқтатып тексерген жол полиция қызметкерлері, көліктік бақылау инспекторларының бір де бірі мұны байқамағаны ма деп таңданады. Айыптау хаттамасында автобустың ішінде терезе сындыратын балғалар, өрт сөндіргіш құрал-жабдықтар, апат бола қалған жағдайда қосымша шығу есіктерінің бар-жоғына мән берілмеген делінген. Ал адвокаттың сөзінше, автобуста 4 балға, 3 өрт сөндіру құралы болған. Оны автобус жүргізушілері де, аман қалған жолаушылар да растаған. Адвокаттың сөзінше, 18-ші қаңтар күні тергеуші-анықтаушылар оқиға болған жерді тексеріп, түсірген бейнетаспа жоқ. Әйтпесе, көп күдікке сол бейнематериал жауап болар еді. Естеріңізге сала кетейік өрт оқиғасы 18-ші қаңтар күні таңда Ырғыз ауданының Қалыбай ауылына жақын маңда болды. Жол жиегіне тоқтап тұрған автобус өртеніп, салондағы 57 адамның 52-сі тірілей жанып кетті. Марқұмдардың барлығы да Өзбекстан азаматы. Ал тірі қалған 5 адамның екеуі жолаушы. Өзбекстандықтар. 3 қазақстандық автобус жүргізушісі Барат Таңатов, Мақсат Пернебеков, Нұржан Қырғызбаев сотталып жатыр. Жарамсыз автобустың ұзақ жолға шығуына рұқсат берді деген механик Бахадир Бердібаев пен заңды тұлға ретінде өз міндетін лайықты түрде атқармаған, жалған құжат жасауға жол беріп, жарамсыз көлікпен адам тасыған "Азия Транзит сервис" компаниясының құрылтайшысы Нұрлыбек Телепбаевқа да айып тағылды.