Ұлы Жеңістің 75 жылдығы мен Ә. Молдағұлованың 95 жылдық мерейтойына арналған республикалық деректі фильмдер байқауының жүлдегерлері белгілі болды. Бүгін Әлия мұражайында марапаттау рәсімі өтті. "Ерлігіңді аңыз ғып таратты ел" деп аталған республикалық деректі фильмдер байқауын алматылық режиссер Наргиза Абдуллаева жеңіп алды. Ол "Ұлы Отан соғысы кезіндегі Қазақстан әйелдері" деректі фильмін ұсынған. Әуесқой режиссер Әмірхан Қоңыратбаев өзінің 20 минуттық деректі фильмін "Әлия" деп атаған. Автор фильм идеясы жастарды патриоттық тәрбиеге баулу дейді. Өрімдей жас ару отан үшін жанын қиды, ал қазіргі жастар ондай ерлікке бара алады ма деген сұрақ мені жиі мазалады, дейді режиссер. Деректі фильм түсіру кезінде батыр қыздың ерлігі туралы аңызға бергісіз тың деректер режиссерді шабыттандырған. Туындының идеясы жоғары бағаланып, Әмірхан Қоңыратбаевтың деректі фильмі байқауда үшінші орынға ие болды. Қазылар алқасының шешімі бойынша бірінші орын "Ұлы Отан соғысы кезіндегі Қазақстан әйелдері" деп аталған Наргиза Абдуллаеваның деректі фильміне берілді. Екінші орын жергілікті кинорежиссер Серік Айжановқа табысталды. Майдан көріністерін ашып, жауынгерлер қаза тапқан жерлерде қазба жұмыстарын түсірген режиссерлердің еңбегі ерекше бағаланды. Байқау шарты бойынша батыр қыздың ерлігі мен оның өмір жолы қатар көрсетілген туынды ерекше бағаланды. Байқауға кәсіби режиссерлер ғана емес, киноматография саласы бойынша білім алып жатқан студенттер де қатысқан. Жергілікті режиссер Серік Айжанов бұл байқауда "Үздік сценарист" номинациясы бойынша тағайындалған марапатқа ие болды.