ҚР Парламент мәжілісі және барлық деңгейдегі мәслихаттарға депутат сайлау коронавирус эпидемиясын ескере отырып, карантин талаптарына сай өтті. Ол жағынан саяси науқанның ұйымдастырылу деңгейіне комиссия мүшелері де, бақылаушылар да оң баға берген. Сайлау учаскелерінде дауыс берушілерге тегін маскалар таратылып, кабиналарға еркін кіріп-шығуға жағдай жасалған. Қала әкімі Асхат Шахаров қоғамдық келісім сарайындағы №52-ші сайлау учаскесінде дауыс берді.Қоғамдық келісім сарайындағы №52-ші сайлау учаскесінде таңғы сағат жетіден бастап қызу жұмыс басталып кетті. Таңғы жетіден сегізге дейінгі бір сағат аралығында учаскеде 90 адам дауыс беріп үлгерді.Бұл учаскеде барлық санитарлық талап сақталған. Комиссия мүшелері де әрбір сайлаушыға жылы қабақ танытып, олардың дауыс беруіне жағдай жасады. Ал, дауыс берушілер халық қалаулылары ел үмітін ақтауға дайын болуы керек, шешімін таппай жатқан әлеуметтік мәселелер жетіп артылады, деп есептейді. №52- ші сайлау учаскесіне таңғы сағат сегізде келіп дауыс берген сайлаушылардың қатарында қала әкімі Асхат Шахаров та болды. Таңертеңмен ерте учаскеге дауыс беруге келген сайлаушылардың көңіл күйі көтеріңкі болды. Жалпы учаскеге 2560 адам тіркелген екен. Комиссия мүшелері тіркелген сайлаушылардың басым көпшілігі осы жерге келіп өз таңдауын жасайтындықтарына сенімді.Учаскеде сайлау барысын үш бақылаушы және екі сенімді өкіл қадағалап отырды. Мүмкіндігі шектеулі азаматтарға арнайы кабина қойылған. Ал сайлаушылар өз қалауынша, жәшіктерге бюллетень салып та, электронды түрде де таңдауын жасады.