Бүгін үкімет басшысы Кәрім Мәсімов облыстық жедел жәрдем ауруханасына да барды. Бұл емдеу мекемесіне 5 маусым күні лаңкестік шабуыл кезінде жараланғандар жеткізілген болатын. Премьер-министр науқастардың жағдайын сұрады. Лаңкестерге қарсы операция кезінде дәрігерлер тәулік бойы күшейтілген режимде жұмыс істеді. Адам өмірін арашалап қалу үшін бар күшін аямаған медицина қызметкерлерін бүгін үкімет басшысы марапаттады. Олардың ішінде-хирург, анестезиолог, жалпы емдеу мейрібикелері мен фельдшерлер бар. Елбасының атынан алғыс хаттар ұсынылып, әрқайсысына ноутбук берілді. 5 маусымдағы атыс кезінде жараланған 4 лаңкестің екеуі дүйсенбі күні ауруханадан шығарылды. Қазір төртеуі де түрме лазаретінде ем қабылдап жатыр. Олардың денсаулығы бірқалыпты. Облыстық денсаулық сақтау басқармасының басшысы Әсет Қалиевтің айтуынша, қазір облыстық жедел жәрдем ауруханасында 5 адам ем қабылдап жатыр. Емделіп жатқандардың екеуі әскери қызметкер, біреуі "Жедел күзет" қызметкері болса, біреуі бейбіт тұрғын. Ал облыстық клиникалық ауруханада қару-жарақ дүкенінің сатушысы жатыр.