Майса Таңсықованың үш баласы бар. Үлкені 5-ші сыныпта оқитын Бекарыс Аманжолов. Одан кейін 2-ші класста оқитын және екі жасар 2 қызы бар. Келіншек қолымнан келгенше балаларыма жақсы тәрбие беріп жатырмын, дейді. Сөзінше, әсіресе ұлымен әркез сөйлесіп, сабағын қадағалап отырады. Айтуынша, баласы есепке жүйрік. Бірақ соңғы кезде Бекарыстың сабағы төмендеп кеткен. Мектеп маңдайынан сипап қаршадай балаға ілім үйретудің орнына, көкірегінен итеріп, білім ордасының маңына жолатқысы жоқ. "Қарға баласын аппағым дер, кірпі баласын жұмсағым дер". Майса да сондай ана. Ұлын жаман деген педагогтарға қарсы шығып отыр. Бекарыс Аманжолов төрт жыл Ғұбайдолла Ақтаев атындағы №6 орта мектепте оқыған. № 62-ші мектепке қараша айының 22-сі күні ауысып келген. Оқушы жаңа мектепте де достарының көп екенін айтады. Баланың өзі мектепке барып, сабақ оқуға құлшынып отыр. Тек педагогтар тентекті тезге салудың орнына одан теріс айналып отырған сыңайлы. №62-ші орта мектеп директоры міндетін атқарушы Айгүл Ханымбетова, мектеп психологы Арайгүл Жұмаханова, орыс тілі пәні мұғалімі Нәйла Бекмұханова Бекарыстың тәртібіне қатысты өз пікірлерін білдірді. Ұстаздар қауымы Бекарыс Аманжоловпен жұмыс істеу мүмкін емес деген қорытынды шығарып қойған. Бірақ психолог маман оқушының ойлау жүйесі тез, кез-келген әңгімені өрбітіп кете алады,- деп отыр. Бірақ не себепті екені белгісіз, мектепте бір келеңсіз жағдай орын ала қалса, оған міндетті түрде Бекарыстың қатысы болады екен. Әлде, "Қасқырдың аузы жесе де қан, жемесе де қан". Мектеп директоры міндетін атқарушы Айгүл Ханымбетованың сөзіне сенсек, оқушы апайларына бірнеше рет орындығын лақтырған. Сыныптастарына қол көтерген. Оқушы қыз баланың иығын сындырған. 11 жастағы оқушының денсаулығында кінәрат бар- жоғын қаладағы бірнеше невролог-дәрігерлер тексерген. Олар баланың бойынан, жүйке жүйесінен ешқандай кінәрат таппай отыр. Медициналық анықтамада Бекарыс Аманжолов ақыл-есі дұрыс, сап-сау бала. Дегенмен, өтпелі кезеңде баланың өзіне көңілді көбірек аудартқысы келетіндігінен осындай әрекеттер туу мүмкін деген тұжырым шығарған. Мұны №2- қалалық емхананың бас дәрігері Қайырбек Тоқтаров да растады. Бас дәрігер баланың өзімен жеке сөйлескен де. Яғни, емхананың шығарған шешімі бойынша бала үйде білім алуы керек. Бекарыстың сыныптастарына кедергі келтірмеуі үшін үйде білім алуына тура келеді. Ал, №62 жалпы білім беретін орта мектеп әрі қарай балаға білім беруге қарсы емес. Ұстаздары оқушымен, ата-анасымен бірлесіп жұмыс істеуге дайынбыз деп отыр. Тек мектепте оқуға рұқсат беретін құжат берілсе болды. Нақты шешім шығарылғанша бесінші сынып оқушысының мектеп табалдырығын аттауына рұқсат жоқ. Ата-ана дені сау баласының үйден білім алуына түбегейлі қарсы.