Бүгін - космонавтика күні! Мерекеге орай қала орталығындағы Виктор Пацаев ескерткіші алдына жас ұшқыштар мектебінің курсанттары мен ардагерлер, мектеп оқушылары мен тұрғындар жиналды. Осыдан 58 жыл бұрын теориялық космонавтиканың түп атасы Константин Циолковскийдің идеясы жүзеге асып, ең алғаш рет ғарышқа Юрий Гагарин аттанған болатын. Ғарышқа жол салған Байқоңыр айлағы Қазақстанды тылсым әлеммен байланыстырып тұр. Гагариннен кейін талай ғарышкер айдың арғы бетіне жол тартты. Бұл тізімде ақтөбелік Виктор Пацаев та бар. Жерлесіміз 1971 жылы "Союз-11" кемесімен ғарышқа ұшты. Алайда 23 тәуліктен кейін жерге оралу кезінде экипаж құрамындағы екі ғарышкермен бірге апатқа ұшырап, қаза тапты. Бүгін митингке жиналғандар батырдың рухына тағзым етті. Мектеп оқушылары мен Виктор Пацаев атындағы жас ұшқыштар мектебі және Талғат Бигелдинов атындағы әуе қорғанысы күштері әскери институтының курсанттары ескерткішке гүл қойып, зымыран макеттерін аспанға ұшырды. Виктор Пацаевтың атын иеленген жас ұшқыштар мектебінде аспан әлеміне қызыққан жеткіншектер білім алып жүр. Ұшқыш болуды армандайтын ұлдар кейін білімдерін Т.Бигельдинов атындағы әуе қорғанысы күштері әскери институтында жалғастыра алады. Мектептің талай түлегі қазір азаматтық, әскери ұшақтарды басқарып жүр. Тарихта алғаш болып ғарышқа ұшқан ұшқыш-ғарышкер, Кеңес Одағының батыры Юрий Гагариннен бастап еліміздің үш ғарышкерін бүгін балаларға үлгі етті. Тоқтар Әубәкіров ғарышты бағындырған тұңғыш қазақ болса, Талғат Мұсабаев пен Айдын Айымбетовтер оның жолын жалғастырды. Дәстүр бойынша жыл басында облыстық планетарий мектеп оқушыларының арасында байқау жариялаған болатын. Оған ғарыштық техникалық модельдеу, қиял мен ғарыш жанрлары бойынша 600-ге жуық бала қатысты. Жеңімпаздар бүгін бағалы сыйлықтармен және дипломдармен марапатталды.