"Жилище" тұрғын үй кешені үлескерлері бүгін қалалық әкімдік ғимаратының алдына жиналды. Наразы топтың айтуынша, баспаналы болғандарына жылдан асса да пәтер құжатына қол жеткізе алмай жүр. Тұрғындар қалалық әкімдіктен мәселеге араласуды сұрайды. "Пәтеріміздің құжатын берсін!". Бұл - әкімдік алдына жиналған үлескерлердің басты талабы. Барлығы Батыс-2 ауданындағы Мұстафа Шоқай көшесі №338 "Б" үйінің тұрғындары. Бір жыл бұрын "Жилище" тұрғын үй кешенінен пәтер сатып алып, енді баспаналарының құжатына қол жеткізе алмай жүр. Талай табалдырықты тоздырып, сотқа да шағымданған. Бірақ іс нәтижесіз. Еш жерден тұщымды жауап таппаған тұрғындар енді қала әкімінен көмек сұрамақ.Қамаркүл Омархан - 2018 жылы "Жилище" тұрғын үй кешенінен үш бөлмелі пәтерді қолма-қол ақшаға сатып алған. 2019 жылы кілтін алып, жөндеу жұмыстарын жүргізген. Әйел енді үйінен айырылып қаламын деген үреймен жүр. Ашулы тұрғындарды сабырға шақырған қалалық ішкі саясат бөлімінің жетекшісі Мәдияр Қабыл әкімдіктегілер бұл жағдайдан хабардар екенін жеткізді. Сондай-ақ, "Жилище" тұрғын үй кешеніне байланысты дау тудырған тағы бірнеше үй әкімдік бақылауында тұрғанын ашып айтты. Аталмыш құрылыс компаниясының басшысына қатысты іс қозғалған. Қазір қамауда. Әкімдік өкілінің айтуынша, компания басшысы азаматтар алдындағы міндетін толық орындамаған. Мәдияр Қабыл алдағы уақытта бұл іс бойынша инициативті топ құрылып, мәселе шешімін табатынын айтты. Ал пәтерлеріне иелік ете алмай отырған тұрғындар әкімнен көмек сұрамақ. Қазір Мұстафа Шоқай №338 "Б" мекен-жайындағы бес қабатты тұрғын үйде 64 отбасы тұрып жатыр. Пәтерлерінің құжаты жоқ тұрғындар балаларын мектепке де, балабақшаға да орналастыра алмай отыр.