Тұрақтандыру қорына көкөністер салынып жатыр. Қыркүйектің бірінен бастап 1-қарашаға дейін тұрақтандыру қорына 1300 тонна картоп, 136 тонна сәбіз, 68 тонна қырыққабат, 200 тонна пияз бен 10 тонна қызылша салынуы тиіс. Қазір бұлардың 90 пайызы жеткізілген. Шаһарымыздағы көкөніс қоймаларының бірі "Пригродный" ЖШС-іне картоп, сәбіз, қызылша, қырыққабат пен жуа сақталады. Бүгінде қызылша 100 пайыз салынып болған. Көкөністердің барлығы жергілікті өнімдер. "Пригродный" ЖШС  өсіретін көкөніс тұқымдары Голландиядан арнайы әкелінген. 2011 жылдан бері голландиялық компаниямен арнайы келісім-шартқа отырған. Ермек Жұмағазиннің айтуынша, жиналып, қоймаға әкелінген өнім арнайы өңдеуден өтеді. +3 градус температурада сақталған картоптар мамыр айына дейін жетеді. Ал, облыстық ауыл шаруашылығы басқармасы мамандары көкөніс қорының жеткілікті екенін айтады. Жергілікті өнімдер ақтөбеліктерді толық қамтамасыз ете алады. Тек өңірде пияз тапшы. Оны Жамбыл облысынан жеткізеді. Тұрақтандыру қорына жиналған көкөністер ақтөбеліктерге әлеуметтік дүкендер, ауыл шаруашылығы жәрмеңкелері арқылы сатылатын болады.