Жолдасынан жылулық көріп емес, жұдырық жеп жүрген келіншектерге алдымен психологиялық қолдау көрсетілуі керек. Мамандардың анасымен қоса баласымен де жұмыс істей алуы маңызды. Өкініштісі шаһардағы тұрмыстық зорлық-зомбылық құрбандарын қабылдайтын орталықтар тұрғындары қатары күрт өсіп кеткен. 20 орындық орталықтар қазір лық толы. Күйеуінен кеткен келіншектердің әрқайсысында 3-4 баладан бар. Валентина – төрт баланың анасы. Жасы 31-де. Күйеуінің ұрып-соққанына 11 жыл бойы төзіп келіпті. Ақыры шыдамы таусылып, кетуді ұйғарған. Есейіп қалған ұл-қыздары бар. Осы он бір жылдың ішінде таяқтан шаршағаннан бірнеше рет кетіп қалдым. Ешқашан хабарласып, жағдайымызды білген емес. Кешірім сұраған да емес. Сонда да бір үмітім болды ма, өзім қайтып барып жүрдім, – дейді шарасыз келіншек.Орталықта қазір Валентинамен тағдырлары ұқсас бес келіншек тұрып жатыр. Әйелдермен бірге кәмелеттік жасқа толмаған 15 бала бар. Балалар мектептердегі сабақтарынан қалмайды. Түрлі үйірмелерге орталықтағы мамандардың көмегімен жеткізіліп жүр. Айта кетелік, кеше үкімет отырысында ішкі істер министрі Марат Ахметжанов елдегі тұрмыстық зорлық-зомбылық мәселесіне қатысты деректерді жариялады. Отбасында ойран салатындардың 80%-ы ер адам. Олардың 52%-ы 30 бен 50 жас аралығында. Тиісінше әйелдер мен балалар да зардап шегіп отыр. Өкініштісі балалар куәгерден жәбірленушіге, кейде қатыгездіктің құрбанына айналады. Бұған мысал жетіп артылады. Түркістан облысында 6 жасар ұлын балталап өлтірген әке туралы жағдай көпшіліктің әлі есінде. ДДҰ деректері бойынша, тұрмыстық зорлық-зомбылық жасөспірімдердің психикасына, рухани және эмоционалдық дамуына кері әсер етеді. Олар бұл мінез-құлық үлгісін құрдастарына және басқаларға көрсетуі мүмкін. Яғни отбасындағы зорлық қатыгездікке итермелейді. ҚР Ішкі істер министрлігі тұрмыстық зорлық-зомбылық құрбандарымен, сондай-ақ құқық бұзушылармен психокоррекциялық жұмыс жүргізуді ұсынып отыр. Бұл бағытта ведомство тұрмыстық зорлық-зомбылыққа қарсы күресті күшейту шараларын әзірледі. Отбасылық-тұрмыстық саладағы құқықбұзушылықтар үшін жаза күшеймек. Қайталап жасалған құқықбұзушылықтар үшін әкімшілік қамауға алу мерзімін 20 тәуліктен 25 тәулікке дейін ұлғайту ұсынылып отыр. Конституцияның жаңа өзгерістеріне сәйкес қоғамдық жұмыстарды сот қаулысымен де тағайындауға рұқсат етілді. Осының аясында "ескерту" сияқты жазаны "қоғамдық жұмыстарға тартумен" ауыстыру ұсынылды.