Бүгін облыстың тәртіп сақшылары қызмет барысында қаза тапқан әріптестерін еске алып, ескерткішке гүл шоқтарын қойды. Сондай-ақ, Отан қорғаушылар күні қарсаңында қызметтік міндеттерін адал атқарып, жоғары нәтиже көрсеткен бірқатар полицейлер ҚР Ішкі істер министрі Марат Ахметжановтың атынан медальдармен наградталды. Мерекелік шараға облыстық полиция департаментінің бастығы Абай Жүсіпов пен ішкі істер органдарының ардагерлері қатысты.
Бүгінгі мерекелік шарада Ішкі істер министрлігінің бұйрығымен қалалық полиция басқармасы жергілікті полиция бөлімшесінің бастығы Жаслан Жексенбаевқа "полиция подполковнигі" , №3 қалалық полиция бөлімінің тергеу бөлімшесі бастығының орынбасары Жақсыгелді Сагиевке "полиция майоры" шені берілді. Бұдан бөлек "Құқық тәртібін қамтамасыз етуге қосқан үлесі үшін" медалімен үш қызметкер, І дәрежедегі "Ішкі істер органдарының үздігі" төсбелгісімен үш қызметкер марапатталды. Тағы бірқатар тәртіп сақшысына "Құрмет грамотасы", "Алғыс хаттар" табысталды. Облыстық ПД бастығының бұйрығымен 12 жас полиция қызметкеріне "полиция лейтенанты" шені берілді.