Қалалық қорымда күніне жүздеген марқұмды жер қойнына тапсырып жатыр деген ақпарат шындыққа сәйкес келмейді. Мұндай мәлімдемені бүгін Кірпішті ауданы маңындағы қалалық қорым әкімшісі Сәбит Дүйсенов жасады. Жауапты маман күнделікті жерлеу рәсімдері көбейгенін жоққа шығарған жоқ. Мұнда тәулігіне 6-7 мүрде жеткізіледі. Бұрын бұл сан 2-3 қана болатын. Ал, жүз табыт жеткізіліп жатыр деген қаңқу сөз жалған дейді қорым әкімшісі. Кірпішті ауылы маңындағы қалалық қорымда бүгін көлік қарасы көп. Жеке көліктерімен кіріп-шығып жатқандар қорымның әкімшілік бөлімі орналасқан бөлігіне бас сұғып нұсқаған жерге қарай жүріп кетеді. Үлкен қорымда ұзына бойы жатқан жеті көше бар. Елімізде қалыптасқан жағдайға байланысты жерлеу рәсімін жүргізуге көп адамның қатысуына рұқсат жоқ. Ал қорым басында рәсімге қажетті дүниелерді сатып отырған сатушының айтуынша шектеуге құлақ аспай келіп жүргендерді көзі шалыпты. Қорым қызметкерлері індетке байланысты жерлеу рәсімдері біршама көбейгенін жоққа шығарған жоқ. Коронавирустан көз жұмғандардың мүрдесін жер қойнына санитарлық талаппен арнайы мамандар тапсырады. Туған туыстарының қатысуына рұқсат берілмейді. Қорымда жерлеу рәсімдеріне қажетті дүниелер қымбаттамаған. Әлеуметтік желілерде тарап кеткен "күрек жетіспейді" деген ақпарат та жалған деп отыр қорымдағылар. Жер қазуға қажетті құрал қоймада бар. Бұрынғы бағасында сатылымда.