Тұңғыш президент атындағы орталық саябақтың күйі кеткен. Жері кеберсіп, тал-теректері қурап жатыр. Шөпке дейін сарғайып кеткен. Әуел бастан саябақ "Керуен Сити" сауда, ойын-сауық орталығы алдымен өтіп жатқан Сазды өзенінен суарылып келген. Алайда Саздының сағасын кеңейтіп, табанын бекіту жұмыстары жүріп жатқандықтан биылдыққа сулы-жасыл гүлзарға су келген жоқ. Кеше шаһар басшысы Мавр Абдуллин орталық саябақтың мүшкіл хәлімен танысып шықты. Көп кемшілік анықталған. Саябақ әкімшілігіне ескерту жасалып, олқылықтарды жоюға санаулы күн берілген. Сондай-ақ, әкім тиісті деңгейде бақылау жүргізбеген тұрғын үй-коммуналдық шаруашылық бөлімінің жұмысын сынға алды. Парк директоры Әділбек Исламовтың сөзінше, саябақты қазір су тасып суарып отыр. Қала әкімінің баспасөз хатшысы Қамбар Мұқашевтың айтуынша бар проблема бас мердігер "Нұрлы парк Ақтөбе" ЖШС басшылығының қалалық әкімдіктен саябақты күтіп-ұстауға берілген қаржыны дұрыс жарата алмау себебінен туындаған. Саябақты суару қосалқы мердігер компанияға жүктелген. Ол да өз міндетіне салғырт қарап отыр. Қалай болғанда да ағаштардың адам аярлық хәлге түскеніне саябақ әкімшісі жауапты. Орталық саябақтың қақ ортасындағы тоғанның жұмысы да бітіп болмады. Субұрқақтар сірә кеуіп тұр. Қала әкімі өзінің жаңа орынбасары Жангелді Әубәкіровке қаланың санитарлық тазалау, абаттандыру және көгалдандыру бойынша міндеттерін орындамаған мердігерлерге қатаң шара қолдануға тапсырма берген.