"Ұрпағы ұлықтаған ата заң". Бұл қалалық мәдениет үйі қызметкерлері ұйымдастырған мерекелік шараның аты. Конституция күніне орайластырылған концерт тұңғыш президент атындағы орталық саябақта өтті. Мерекелік шараға қалалық мәдениет үйінің 30-ға жуық өнерпазы атсалысты. Әртістер күннің суықтығына қарамастан сахнада би билеп, ән шырқады. Сахнада туған елге деген сүйіспеншілігін әнімен білдіріп, ақтөбеліктерге мерекелік көңіл-күй сыйлаған жас өнерпаздардың бірі - Нұрсұлтан Бүркіт. Талантты балғын бүгін сахнада патриоттық екі ән шырқады. Саябақта концерттен бөлек "Ата заңым мақтанышым- қорғаным" тақырыбында шығармашылық көрме ұйымдастырылды. Оған 50-ге жуық кітап пен журнал қойылған. Кітапханашылар қызығушылық танытқан тұрғындарға заңның тармақтарынан оқып берді. Тұңғыш президент атындағы орталық саябақта мереке күні де әдеттегідей қолөнершілер көрмесі өтті. Шеберлердің қолынан шыққан бұйымдарды нәзік жандылар қызықтап сатып алып жатты. Ал шаһардың кішкентай тұрғындары асфальтқа сурет салу байқауына қатысып, бағалы сыйлықтарға ие болды.