Өңірімізде ана мен бала өлімі төмендеген. 2016 жылмен салыстырғанда былтыр ана өлімі 3 есеге, шетінеген шақалақтар саны 24,3 пайызға азайған. Бұл туралы бүгін облыстық денсаулық сақтау басқармасының басшысы Әсет Қалиев мәлімдеді. Қазір аймақта 2500-ден астам бала екпе алмаған. Олар негізінен Байғанин, Темір, Хромтау, Шалқар, Мұғалжар аудандары мен облыс орталығының тұрғындары. Облыстың бас дәрігері түсіндіру жұмыстары жүргізілгенімен ата-аналарын күштеп көндіре алмаймыз дейді. Ал, жүрек-қан тамырлары, құрт ауруларымен тіркелгендер саны 2016 жылмен салыстырғанда төмендеген. Тек онкологиялық науқастар саны артып отыр. Былтыр 1599 адам тіркеуге алынған. 2016 жылға қарағанда 151 адамға көбейген. Жыл басында қатерлі ісікке шалдыққандарға дәрі жетпей жатыр деген шу шыққан еді. Науқастар дәрі таппай, кейбірі шөппен емделуге көшкен болатын. Қазіргі жағдай қалыпты. Онкогемотологиялық ауруларға шалдыққан балалар да жиі тіркеліп жатыр. Батыс өңірінде мұндай 140 бала бар екен. Ақтөбеде осындай ауруға шалдыққан балаларды емдейтін 4 дәрігерді дайындау қолға алынған. Өңірімізде 10 мыңнан астам медициналық қызметкер бар. 7000-ы дәрігер. Дәрігерлер тапшылығы да жоқ емес. 66 дәрігерге сұраныс бар. Ақ халаттылар тұрғындарға 2017 жылы 1200-ден астам мамандандырылған медициналық көмек көрсеткен. Бауыр, бүйрек, жамбас, буын ауыстыру оталары жасалды.