Өрт қауіпсіздігін сақтаңыз! Облыс аумағында осындай атаумен арнайы айлық акциясы өтіп жатыр. Айлық акция кезінде төтенше жағдай қызметі мамандары үйлерді аралап, жылыту маусымына дайындық, от жағу талаптары, пешті алдын-ала жөндеп, пайдалану жағдайларын бақылауда. Өрт қауіпсіздігі талаптарын бұзған 1238 ақтөбелік отбасына ескерту берілген. Облыстық төтенше жағдайлар департаментінің мамандары күз, қыс мезгілдерінде қауіпсіздік ережелерін мейлінше мұқият сақтауды ескертеді. Мамандар өрттің негізгі себебі - тұрғындардың салғырттығы мен немқұрайлылығында екендігін айтады. Өйткені өңірде отты абайсызда қолданудан 260 өрт тіркелсе, балалардың отпен ойнауы салдарынан 32 өрт шыққан. Хромтау, Мәртөк, Қарғалы, Ойыл, Шалқар аудандарында дала өрттері жиі тіркеліпті. Елді мекендерде 322 ерікті өрт сөндіру құрылымдары құрылған. Олардың құрамында 2300 белсенді адам жұмыс істейді. Биылғы жылы тілсіз жаудың алдын алуға 170 млн теңге бөлінген. Мол қаржы өрт сөндірушілерді жарақтандыруға, оқытуға жұмсалып жатыр. Қазір орман және дала өрттерінің алдын алу және жою жөніндегі тобы жұмыс жасап жатыр. Қала маңындағы бау-бақша ұжымдарында жедел топ мүшелері тұрғындармен өрт қауіпсіздігі талаптарын сақтау бойынша түсіндіру жұмыстарын жүргізуде. Алдағы екі жылда облыста оннан аса өрт сөндіру бекеті пайда болады. Жыл соңына дейін 8 өрт сөндіру бекеті жұмысқа кіріспек. Мұндай бөлімшелер Алға, Шалқар, Мұғалжар, Байғанин, Ырғыз аудандарына салынады.