Бүгін облыстық тарихи-өлкетану музейі ашылды. Жаңа облыстық тарихи-өлкетану музейінде әзірге бес экспозициялық зал ашылған. Жоспарланғаны 11 зал. Мұражай қорында 100 мыңнан астам жәдігер бар. Олар минералогия, палеонтология, ботаника, археология, сәндік-қолданбалы өнер, нумизматика, сирек кітаптар, мұрағат құжаттары мен фотоматериалдар бойынша құнды топтамаларға бөлінген. Жалпы алаңы 4,3 мың шаршы метрлік жаңа ғимаратта артефакттарды сақтау үшін барлық жағдай жасалған. Алда музей қорын толықтыру үшін тарихи жәдігерлер сатып алынады. Облыстық тарихи-өлкетану музейі Ақтөбеде 1929 жылы ашылды. Тозығы жеткен тар ғимарат 2015 жылдың қаңтарында жабылған еді. Жаңа музейдің құрылысына 650 млн. теңге жұмсалды. Былтыр «Рухани жаңғыру» бағдарламасы аясында басталған жобаның жартысын кәсіпкер Исламбек Салжанов қаржыландырды. Бүгін мұнда ҚР Тұңғыш Президенті - Елбасы кітапханасының көрме жобасы да ашылды. Көрме президенттің тәуелсіз Қазақстанның тарихи өміріндегі рөлінен сыр шертеді. 5 бөлімнен тұрады. Онда президенттің жоғары мемлекеттік наградалар жинағы, мемлекет басшылары мен қазақстандық авторлар тарту еткен қолтаңбасы бар кітаптар қойылды. Ақтөбе - көшпелі көрме келген төртінші өңір. Тұңғыш президент күні қарсаңында аймақта ашылған «Нұрсұлтан Назарбаев: дәуір, тұлға, қоғам» көшпелі қор көрмесі аясында Қ.Жұбанов атындағы Ақтөбе өңірлік мемлекеттік универсиетінде «ҚР Тұңғыш Президенті - Елбасы кітапханасы» оқу залы ашылды. Оқу орнының кітапханасына елбасы кітапханасы атынан 350-ден астам кітап тарту етілді. 1990-2016 жылдар аралығындағы елбасының қызмет хроникасы, ресми биографиясы, мемлекет басшысы туралы отандық, шетелдік авторлардың кітаптары бар. Көшпелі көрме 20 қаңтарға дейін жалғасады. Ақтөбеліктер тегін тамашалай алады.