Осыдан 10 жыл бұрын Шұбаршидағы лаңкестік оқиғалар кезінде қаза тапқан ақтөбелік полиция қызметкері Айдос Боранбаевтың отбасын облыстық полиция департаменті бастығының міндетін атқарушы Қанат Әлиев мерекемен құттықтап барды. ҚР Тәуелсіздігінің 30 жылдығы қарсаңында марқұмның артында қалған жары мен балаларына жылы лебізін білдіріп, сый-сияпат тарту етті. Облыстық полиция департаменті бастығының міндетін атқарушы Қанат Әлиев Айдос Боранбаевтың отбасын ҚР Тәуелсіздігінің 30 жылдығымен құттықтап, мерекелік сый-сияпат тарту етті. Ол марқұмның жұбайы мен балаларына департамент тарапынан әрқашан қолдау көрсетілетінін жеткізді.Айта кетейік, патрульдік-қарауыл қызметінің сержанттары Айдос Боранбаев пен Нұрлан Алпысбай 2011-ші жылы 30-маусымда кешкі сағат сегіздер шамасында "УАЗ" қызметтік көлігімен Шұбарши ауылын патрульдеуге шығады. Түн жарымында «Митсубиши Делика» көлігімен белгісіз біреулер келіп, олар отырған қызметтік көлікке "Сайга", "Макаров" тапаншасы және аңшы мылтығынан оқ жаудырып, оқиға орнынан іздерін суытады. Бірнеше жерінен жараланған тәртіп сақшылары сол жерде жан тапсырған. Ол уақытта полиция қызметкерлері қарусыз болған. Қазіргі таңда Айдостың артында 2 қызы мен жары қалды. Заңдылық пен құқық тәртібін сақтап, қызметтік парызын адал атқарып, жауынгерлік ерлік танытқаны үшін Темір аудандық ІІБ патрульдік полиция тобының полицейі, аға сержант Айдос Боранбаев көз жұмған соң ІІІ дәрежелі «Айбын» орденімен марапатталды.