Облыстық музей құрылысы аяқталды. Батыс-2 ауданындағы Ораз Тәтеұлы көшесінде бой көтерген жаңа ғимарат 3 қабатты. Қазір әрлеп, көркемдеу жұмыстары жүріп жатыр. Экспонаттар орналастырылуда. Музей құрылысына 635 млн. теңге қарастырылған. Жартысын ақтөбелік меценат Исламбек Салжанов бөліп отыр. Қалған қаржы облыстық бюджеттен бөлінген. Әдемі ғимаратты "Элитстрой сервис" кұрылыс компаниясы көтерген. Музейде 11 зал болады. Көрме, табиғат, археологиялық, қазақ хандығы, 1869-1940-шы, ҰОС жылдарындағы, 1945-1991 жылдар аралығындағы өңір тарихына қатысты, рухани жаңғыру залдары болады. Әзірге бес зал ашылады. Музейдегі 48 шаршы метр көлеміндегі алтын залды да тұрғындар тамашалай алады. "Алтын залда" көп жылдар бойы аймақта жүргізілген қазба жұмыстары кезінде табылған әшекей бұйымдар орналасады. Ерте темір дәуірі, орта ғасырларға қатысты, жаңа замандағы қазақ мәдениетіне тиесілі бұйымдар қазір бар. Ал, 1-қабаттағы табиғат залында өңірдің флора, фаунасының материалдары қойылады. Экспонаттарды орналастыру, көркемдеу жұмыстарымен "Заман-Ту" ЖШС-і айналысып жатыр. 15 адамнан құралған жұмысшы тобы жұмыс жасауда. Алматыдан шақыртылған 4 кәсіби суретші-дизайнер бар. 5 диорама салынады. Түркілер мен сарматтар заманының кескіндемелері де бейнеленеді. Облыстық музей қыркүйекте ашылады деп жоспарланған. Қазірден бастап қала тұрғындары да музейге жәдіреглер тасып жатыр.