Мәслихат депутаттары бүгін 2017- жылы атқарылатын істермен танысты. Облыстық басқарма басшылары алдағы жылдың жоспарымен бөлісіп, оларды орындауға қажет қаржы мөлшерін жариялады. Алғаш боп облыстық денсаулық сақтау басқармасының басшысы Әсет Қалиев баяндама жасап, бөлінетін қаржының екі есеге қысқаратынын мәлім етті. Биыл бұл ведомство 7 миллиард теңгеден астам қаржыны игерсе, келер жылы небәрі 3 миллиард теңгеге жуық қаржы қарастырылып отыр. Қаржының 88 миллион теңгесі басқармадағы мемлекеттік қызметкерлерге жұмсалса, біліктілікті арттыру жұмыстарына 45 миллион теңге бөлінбек. Белгілі бір санаттағы науқастарды тегін дәрі-дәрмекпен қамтамасыз етуге 142 миллион теңге, екпеге 104 миллион теңге жаратылады. Дегенмен, шешімін таппай тұрған мәселер әлі жетерлік.
Облыстың бас дәрігері Әсет Қалиев балаларға арналған медициналық сауықтыру орындарындағы педагогтар мен қорғаныс саласындағы медицина қызметкерлерінің де облыстық денсаулық сақтау басқармасы бюджетіне ортақ екенін алға тартты. Мәселен, "Шағала" сауықтыру орталығындағы мұғалімдерге жалақы төлеу үшін 67 миллион, ал әскерге баратын ер азаматтарды медициналық тексеруден өткізетін 100-ден астам дәрігер мен медбике қорғаныс саласынан емес, денсаулық басқармасынан 200-миллион теңгеден астам еңбекақы алады. Жаңа жобалармен жіті танысқан облыстық мәслихат депутаттары бұл жұмыстың басы деп отыр.
Басқарма басшылары осы жолмен қараша айының соңына дейін депутаттардың алдында келер жылғы жұмыс жоспарларымен бөліседі. Басшылар бюджеттің қысқарғанын естен шығармауы керек. Биыл қазынадағы 195 миллиард теңге жұмсалса, келер жылы бюджет қаржысы 170 миллиард теңгеге шақталады.