"Жекпе-жек" сарайын бір жылға жалға алу үшін облыстық бюджеттен 150 миллион теңге бөлінді. Ал, жыл бойы қызмет ететін "Әсем" лагерінің оқу корпусын салуға 250 миллион теңге қарастырылады. Бүгін облыстық мәслихаттың бюджет, экономика, өнеркәсіп және кәсіпкерлік жөніндегі комиссияларының кеңейтілген отырысында облыстың биылғы бюджеті қайта нақтыланды. Облыстық экономика және бюджетті жоспарлау басқармасының басшысы Олжас Смағұловтың айтуынша, биыл білім саласына 853 миллион теңге бөлінген. Бестамақ ауылындағы 100 балаға есептелген сауықтыру лагерін жөндеуге 75 миллион теңге берілді. Батыс-2 ауданындағы арнайы балабақша мен қалада жаңадан ашылған алты мектептің шығындарына 85 миллион теңге қарастырылып отыр. "Сымбат" жеке мектебінде 100 баланы тегін оқыту үшін бюджет 69 миллион теңге бөлді. Ауыл шаруашылығы колледжі ғимаратын толық күрделі жөндеу үшін 46 миллион теңге берілмек. Бұл колледжді тез арада қалпына келтірмесе болмайды. Оқу орны лицензиясыз қалуы мүмкін. Мемлекеттік-жеке меншік әріптестік негізінде 5 алаңы бар спорт кешенін жалға алу мәселесі де депутаттарды бей-жай қалдырмады. Облыстық әкімдік спорт кешенін 74 миллион теңгеге жалдамақ. Бұл кешенге қаражат бөлу жайы сұрақ болып қалды. Депутаттар алаңдарды тағы бір мәрте қарап шықпақ. Ал, депутат Асқар Болатов Батыс-2 ауданындағы 151 миллион теңгеге жалға алынбақшы спорт кешені жайын сұрады. Олжас Смағұловтың айтуынша, "Жекпе-жек" сарайы ғимараты жоғары спорт шеберлігі мектебі үшін жалға алынбақ. Мұнда жекпе-жектердің олимпиадалық түрлері бойынша оқу-жаттығу жиындары өтеді. 900 бала қамтылады. Тағы 200 бала спорттық жетілдіру тобында дайындалады. Бүгінгі отырыста сондай-ақ, жаңа көшелерге атау беру жайы айтылды. Облыстық тілдерді дамыту басқармасының басшысы депутаттарға бірнеше нұсқа ұсынды. Ал, Қобда гимназиясына Исатай Таймановтың, Қобда орта мектебіне Қобыланды батырдың есімдерін беру туралы ұсыныс жасалды.