Шаһарда жол жөндеу жұмыстары қарқынды жүріп жатыр. Алайда бәрінің бірдей сапасы сын көтере бермейді. "Жол активтерінің ұлттық сапа орталығы" Ақтөбе филиалының мамандары биылдыққа 20 нысанды тексеріп, алынған 189 сынаманың 24-ін жарамсыз деп тапқан. Кезекті тексеру жұмыстары бүгін Есет батыр көшесінде жүргізілді. Аталған көшеге жаңадан төселіп жатқан асфальт жабынынан сынама алынып, зертханаға жолданды. Бүгін "Жол активтерінің ұлттық сапа орталығы" Ақтөбе филиалының мамандары орташа жөндеу жұмыстары жүріп жатқан Есет батыр көшесінде болды. Бұл көшенің Ватутин көшесінен Абай даңғылына дейінгі бөлігі биыл, Абай даңғылынан Ә.Молдағұлова даңғылына дейінгі бөлігі келесі жылы жөнделеді. Биылғы орташа жөндеу жұмыстарына бюджеттен 730 млн теңге бөлінген. Қазір жолға бір қабат асфальт төселген. Енді оның сапасын тексеру үшін "Жол активтерінің ұлттық сапа орталығының" мамандары сынама алды. 3 күннен соң нәтижесі белгілі болады. Егер жол сапалы болса, мердігер мекеме жұмысын әрі қарай жалғастыра береді, ал егер кемшіліктер анықталса 15 күн ішінде жойылуы керек. Жыл басынан бері сапаны бақылаушы мекеменің зертханасына 20 нысаннан 189 сынама алынған. Олардың ішінде 24-і жарамсыз деп танылып, анықталған кемшіліктерге байланысты мердігер мекемелерге хаттама толтырылған. Төселген асфальт жабындары ауыстырылған. Сонымен қатар сапаны тексеретін мекеме мамандары 10 шақты нысанда төселгелі жатқан жол-құрылыс материалдарының сапасыз екенін анықтап, дер кезінде ауыстыруға мұрындық болған. Тельман Малаевтың айтуынша, былтырғыға қарағанда кемшіліктер әлдеқайда азайған. Мәселен, былтыр жол жөндеу жұмыстарында 100-ден астам сынама жарамсыз деп танылған. Сондай-ақ, орталық жергілікті әкімдікпен келісімшарт негізінде жол жөндеу жұмыстары басталғанға дейін жол-құрылыс материалдарын тексеруге рұқсат алған. Соның нәтижесінде көптеген заңбұзушылықтардың алдын алып, сапалы жолдарға қол жеткізуге болады, дейді. Қазір өңірде жол жөндеу жұмыстарына сапалы құрылыс материалдары қолданылуда. Орталық директоры облыста битум тапшылығы бар екенін атап өтті. Себебі, жуырда "Жол активтерінің ұлттық сапа орталығы" павлодарлық битумның сапасыз екенін анықтап, зауыт жұмысын уақытша тоқтатқан. Ал, біздің өңірге битум Ақтаудан жеткізілуде. Оның сапасы әлдеқайда жоғары дейді мамандар.