Жаңадан салынып жатқан шағын аудандарда учаскелік инспекторлар жоқ. Өйткені Ақтөбеде маман тапшы. Бұл туралы бүгін депутаттар алдында облыстық ішкі істер департаментінің бастығы Махамбет Абисатов мәлім етті. Өңірімізде 300 мектеп инспекторы және 200-ге жуық жол инспекторы жетіспейді. Алайда Ақтөбе полициясы маман тапшылығын шешудің орнына оларды қысқартуға мәжбүр. Облыстың бас полицейі Махамбет Абисатов қазір аймақтағы полиция қызметкерлерінің он пайызын қысқарту туралы құжат дайындап жатқанын алға тартты. Облыстың бас тәртіп сақшысының айтуынша заңдағы өзгерістер жәбірленушіге қарағанда, қылмыскерді көбірек қорғайды. Қылмыс бойынша күдікті тұлғаларды ұстау мерзімін бар болғаны үш сағатпен шектеу тіпті де бізге келмейді. Ал босатып жіберген тұлғалар бұрынғы әніне қайта басады. Мәселен мойнында 10-20 ұрлық бар кәдуілгі 48 ұрының дені немесе 92 пайызы қамауға алынбаған. Үйқамаққа жіберілген, қолхатпен босатылған. Бұл олардың жаңа қылмыс жасауына жол ашады. Статистика бойынша Ақтөбеде ұрлық жасағандардың 89 пайызы жұмыссыз. Ал Әкімшілік кодекстен алдын алу мақсатында ұстау бабы жоғалды. Бұл көше кезбелерінің басқа шығуына алып келді. Батыстың үлгісі бойынша реформа жасау жұмыс нәтижесін де сол әлемдік стандартқа жақындатты дейді облыстың бас полицейі. Бірақ, жақсы жағына қарай емес. Ізгілендіру бір бөлек, қылмысты ашу бір бөлек. Әзірге облыста қарақшылық, адам тонау қылмыстарының 70-90 пайызы ашылып жатыр. Ұрлық 28-30 пайыз шамасында. Дегенмен бара-бара ақтөбелік полиция да Италиядағыдай қылмыстың бес пайызын ғана ашып отыра беруі мүмкін дейді Махамбет Абисатов. Ал жол-патрульдік полиция қылмыстардың 37 пайызының ізін суытпай ашқан. Осы тұста Абисатов 102 нөміріне қатысты мынадай мәліметтерді алға тартты. Облыстық ішкі істер департаментінің бастығы Махамбет Абисатов бұл мәселені шешудің жолын ұсынды. Ол үшін облыстық әкімдік бірыңғай колл-орталық ашуы керек. Оны смарт-сити жобасы шеңберінде жүзеге асыруға болады. Облыс полициясы сонымен қатар қазір электрондық форматта іс жүргізуге кірісіп жатыр. Ал депутаттар тарапынан мобильді қосымша ашу ұсынысын бас тәртіп сақшысы қажеті жоқ дүние деп қысқа қайырды. Өйткені іс тек арыз түскенде ғана қозғалмайды, дерек бойынша да қозғала береді деген уәжді алға тартты.