Ақтөбеде 129 мың оқушы бар. Олар биыл 415 мектепте білім алады. Бүгін облыстық білім басқармасының басшысы Сәуле Өмірбекова қала маңындағы ауыл мектептерінің жаңа оқу жылына дайындығын тексерді. Басты назарда білім мекемелерінің тазалығы, жөндеу жұмыстарының барысы, мұғалімдердің даярлығы. Өңірдің бас ұстазының айтуынша, жаңа оқу жылына дейін 9 мектептің құрылысы аяқталады. Тағы 5 мектеп келесі жылдың басында оқушыларды қабылдайды. Шаһарда биыл 19 мектеп ағымдағы жөндеуден өткен. Қала мектептерін күрделі жөндеу келесі жылға қалдырылыпты. 69 мыңға жуық оқушы облыс орталығындағы 73 мектепте білім алады. Биыл 8800 бүлдіршін 1-класқа барады. Қазір қалада 4 мектептің құрылысы ақталуға жақын. Ал, қаланың ескі бөлігіндегі бұрынғы "Сымбат" жеке мектебін мемлекет сатып алған. Дайын білім ордасында жаңа оқу жылынан бастап №6,11,22 орта мектептердің артық оқушылары білім алады. Одан өзге, Батыс-2 ауданында 2, К.Нокин ауылында, Бауырластар елді-мекенінде 320, 600 орындық мектептер жаңа оқу жылында жұмыстарын бастайды. Облыс мектептерінде оқулық мәселесі жоқ. Бүгін қалаға 2,5,7 сынып оқулықтарының алғашқы легі жетті. Мәртөк, Байғанин аудандарының білім ордаларына жаңа оқулықтар үлестірілген. Биыл оқулықтарға бюджеттен 1 млрд. 200 млн. теңге бөлінген.