Коммуналдық кәсіпорындар биылғы қыстан рақымшылық күтіп отырған жоқ. Бұл жөнінде бүгін баспасөз мәслихатында "ҚазАвтоЖол" ҰК" АҚ облыстық филиалының директоры Бағлан Баймағамбетов мәлімдеді. Автокөлік жолы бойындағы сервистік қызмет облысымызда енді-енді бірізділеніп келеді. Қысы қатаң, жолы ұзақ Ақтөбе үшін кемпингтер әр шақырым сайын тұрғызылса да артық емес. Өңір үстімен өтіп жатқан ең ұзын дәліз Самара-Шымкент тас жолы. 700 шақырым. Бір басы Батыс Қазақстан облысымен, екінші бір ұшы Қызылорда облысымен шекарада аяқталады. Одан бөлек Қостанай, Атырау, Ресейдің Орск қаласымен араны байланыстырып жатқан республикалық, халықаралық дәрежедегі тас жолдар бар. Қазір осы жолдар бойында сервистік бекеттер саны 110-ға жеткен. Оның 68-і Самара-Шымкент тас жолының бойында орналасқан. Облыстағы кемпингтер бір мезетте 700-800 адамға қызмет көрсете алады. Осындай жағдайда көлік кептелістерінің алдын алу үшін биыл "Қазавтожол" жаңа алты аялдама жасады. Бұдан былай сынық көліктер жол бойында қаңтарылмайды. Бір ғана Самара-Шымкент тас жолымен күніне 5 мыңнан 10 мыңға дейін көлік қатынайды. Осындай қарбаласта "Қазавтожолдың" негізгі міндеті жолдарды қардан тазартып, көктайғақты болдырмау. Жолаушылардың бөгелуіне жол бермеу. Облыс үшін тас жолдарды күтіп-ұстауға жалпы есеппен 160 техника қажет болса, "Қазавтожол" мекемесінің иелігінде соның тең жартысы ғана бар. 13 жаңа техниканы биыл сатып алып жатыр. 20-30 арнайы техниканы мердігер мекемелерден алған. Биыл сондай-ақ, далалықтың қарын тоқтататын шарбақтар тоқылған. Хромтау ауданында 5 шақырымға темір-бетон қақпалар қойылды. Келер жылы тағы 10 шақырымға орнатылады.