Облыста пневмонияға шалдыққандар саны азайып келеді. Өткен тәулікте 79 науқас стационарларға жатқызылған. Бұрын бұл көрсеткіш жүзден асып жығылатын еді. Мұндай деректерді бүгін өңірлік коммуникациялар қызметіндегі брифингте облыс әкімінің денсаулық сақтау мәселелері жөніндегі кеңесшісі Әсет Қалиев келтірді. Облыс әкімінің денсаулық сақтау мәселелері жөніндегі кеңесшісі Әсет Қалиевтің айтуынша, қазір облыс бойынша 1675 науқас стационарларда пневмониядан ем алып жатыр. Бұл шамамен 64,5 пайыз орынды қамтиды. Өткен тәулікте 79 науқас өкпе қабынуы диагнозымен ауруханаға түссе, 91 науқас жазылып шыққан. Спикердің сөзінше, провизорлық ауруханалардың барлығы қазіргі таңда тиісті дәрі-дәрмектермен қамтылған. 20 күнге жететін дәрі қоры бар. Сондай-ақ, Әсет Қалиевтің айтуынша, қазір өңірде перзентханалар жұмыс істеп тұр.Тек коронавирус жұқтырған жүкті әйелдерге қосымша кереуеттер дайындалған. Мәлім болған тағы бір жай: пандемияға байланысты уақытша тоқтатылған күнтізбелік вакцинациялау алдағы дүйсенбіде қайта басталады. Әзірге вакцина тек пензентханаларда ғана егіліп жатыр. Вакцинамен қоса, емханаларда жоспарлы тексерулер мен скрининг жұмыстары алдағы аптада қайта жанданады.