Облыста коронавирус жұқтырғандар саны 55 адамға жетті. Оның 18-і Мәскеуден оралған студенттер. Індет жұқтырғандықтары зертханалық жолмен анықталған жастар кеше облыстық жұқпалы аурулар ауруханасына жатқызылған. Олармен тығыз қарым-қатынаста болған тағы 20 адам 14 күнге карантиндік бақылауға алынды. Коронавирус жұқтырған студенттердің барлығы Ресейдің Мәскеу қаласынан келген. Шетелде оқып жүрген еліміздің әр облысының тумалары. Араларында ақтөбелік студенттер жоқ. "Жайсаң" бекеті арқылы өткен. Сол уақытта тапсырған сынамалары теріс нәтиже берген. Бірақ, қалада жүргізілген зертханалық тексеру олардың қауіпті індетті жұқтырғанын растады. Жастар емдеу стационарына кеше жатқызылған. Ем қабылдап жатқандардың жағдайлары орташа ауыр. Облыстық жұқпалы аурулар ауруханасына кеше студенттерден бөлек тағы екі науқас жатқызылған. Олар Атырау қаласынан оралған қала тұрғындары. Көршілес Атырау, Ақтау қалаларынан өткен тәулікте вахталық әдіспен жұмыс жасайтын 432 жұмысшы келді. Барлығының қан құрамынан вирус анықталмаған соң үйлеріне жіберілген. Бірақ жұмысшылар екі апта үй карантинінде болады. Өңірдің бас дәрігері елге оралушылардың жағдайын бақылауда ұстаудың қалыпты жүргізіліп жатқандығын жеткізді. Алаңдауға негіз жоқ, дейді ол. Провизорлық госпиталь ретінде пайдаланылып жатқан жатақханалар санитарлық талаптарға сәйкес тазаланды. Ал, біздің өңірде емдік курстан толықтай өткен студенттер келесі айдан бастап туған қалаларына жергілікті әкімшілік бөлген арнайы көлікпен жеткізілетін болады.