Бүгін өңірлік коммуникациялар қызметінде кезекті онлайн брифинг өтті. Коронавирус індеті мен пневмония ауруының өңірдегі қазіргі жағдайынан облыстық тауарлар мен көрсетілетін қызметтердің сапасы мен қауіпсіздігін бақылау департаментінің басшысы Нұрсұлу Беркімбаева мен облыстық денсаулық сақтау басқармасы басшысының міндетін атқарушы Светлана Есенаманова хабар берді. 22 маусымдағы жағдай бойынша облыста коронавирусқа шалдыққандар саны 628 адамға жетті. Карантиндік шектеу шараларын орындамаудың салдарынан ауру күннен күнге белең алып келеді, дейді мамандар. Аймақтың бас мемлекеттік санитарлық дәрігері Нұрсұлу Беркімбаеваның айтуынша, егер жағдай ушыға берсе, сақтық шаралары күшейтілетін болады.Ведомство басшысы сондай-ақ, қалада дәріханаларға тұрақты мониторинг жасалып жатқанын, қазіргі таңда парацетамол, аспирин секілді дәрілік препараттардың жеткілікті екенін жеткізді. Расында, бүгінде дәріханалардағы кезек ұзын сонар. Себебі, өңірде коронавируспен қатар пневмония дерті де өршіп тұр. Мәселен, маусым айының өзінде бұл ауруға шалдыққандар саны 700-ден асып кеткен. Өкінішке орай, облыста пневмониямен ауырған 18 адам көз жұмды. Олардың басым бөлігі темір жол ауруханасында емделген. Светлана Есенаманова көптеген науқастардың дәрігер тағайындауы бойынша үйде ем алып жатқанын атап өтті. Коронавирус пен пневмонияның өсімі аудандарда да байқалады.