Аймаққа коронавирусқа қарсы вакцинаның жаңа партиясы жөнелтілген. Қазір дәрігерлерді екінші қайтара егу жүріп жатыр. Жаңа партиядан ауысқанымен мұғалімдер және тәртіп сақшыларын вакцинациялау басталады. Бұл туралы бүгін өңірлік коммуникациялар қызметі алаңында өткен брифингте облыстық денсаулық сақтау басқармасы басшысының орынбасары Бекболат Ізбасаров мәлім етті. Өңірде медицина қызметкерлерін егу өткен ай бойы жүргізілді. Бүгінге дейін 480 дәрігер мен орта буын медицина қызметкері екінші қайтара вакцина алып болған. Науқан әлі жүріп жатыр. Зертханаларда 331 мың сынама талданған. Былтыр наурыздан бері індетті жұқтырған ақтөбеліктер саны 4268 адамға жетіп отыр. Оның тең жартысы дерттің симптомды түрін жұқтырған. 4268 деректің 82 пайызы жергілікті жағдай. 3,4 пайызында ғана ковидті тұрғындар сырттан жұқтырып келген. Соңғы мәліметтер бойынша облыстық санитарлық-эпидемиологиялық бақылау департаментіне карантин талаптарының бұзылғандығы жөнінде 16 хабарлама түскен. Жоспардан тыс тексеру жүргізіліп, 12 нысанға 816 мың 760 теңге айыппұл салынған. Біздің облыс коронавирус инфекциясының таралуы бойынша "жасыл" аймақта. Дегенмен дәрігерлер мен эпидемиологтар сақтық шараларын естен шығармауды ескертеді.