Облыста карантин ережелерін бұзушылар саны артты. Арнайы мобильді топ жұмысының нәтижесінде шілденің 5-інен бері тәртіп бұзғандарға қатысты 500-ден астам хаттама толтырылып, 56 млн теңге айыппұл салынды. Облыстың тауарлар мен көрсетілетін қызметтердің сапасы мен қауіпсіздігін бақылау департаментінің мәліметінше, бұйрыққа бағынбай той, садақа жасайтын нысандар азаймай тұр. Өңірде карантиндік шектеулер біртіндіп жеңілдетілгенмен, демалыс күндердегі локдаун әлі күшінде. Қалың бұқара жиналатын мерекелік шараларға қатаң тыйым салынғанмен, тәртіпке бағынбай, заңбұзушылықтарға жол беретіндердің қатары әлі де азаймай тұр. Өз кезегінде арнайы мобильдік топтың жұмысы қарқынды жүріп жатыр. Олар облыстың бас мемлекеттік санитарлық дәрігері қабылдаған қаулының орындалуына бақылау жүргізуде. Өткен екі ай ішінде бұйрыққа бағынбай, заң бұзғандардың үстінен 504 әкімшілік хаттама толтырылған. Нәтижесінде 56 млн 73 мың 930 теңге көлемінде айыппұл салынды. Атап өтейік, бүгін еліміздің денсаулық сақтау министрі Алексей Цой орталық коммуникациялар қызметінде брифинг өткізіп, Қазақстан коронавирус инфекциясының болуы ықтимал екінші толқынына дайындалып жатқанын мәлімдеген еді. "Эпидемиологиялық ахуал тұрақталғанымен қауіптің беті біржолата қайтты деуге әлі ерте", дейді министр. Сондықтан елдегі карантиндік шектеулердің бірқатары әлі де сақталады. Оның ішінде демалыс күндердегі локдаун күшінде қалады. Ақтөбеде өңірдің бас мемлекеттік санитарлық дәрігерінің 51-қаулысына сәйкес келесі нысандардың жұмысы сенбі-жексенбі күндері уақытша тоқтатылады. Сонымен қатар, азық-түлік, киім-кешек, құрылыс заттарын сататын жабық базарлардың да демалыс күндері жұмыс істеуіне тыйым салынған. Бұл шаралар аурудың таралуын болдырмай, жағымды динамиканы сақтау үшін жасалып отыр. Сондықтан, облыстың тауарлар мен көрсетілетін қызметтердің сапасы мен қауіпсіздігін бақылау департаменті тұрғындарға мерекелік, отбасылық шараларды тоқтата тұру керектігін ескертеді. Қоғамдық орындарда бетперде тағып, әлеуметтік арақашықтықты сақтауға, қолды жиі жуып, антисептиктерді пайдалануға шақырады.