Бүгін қос әкім жаңадан салынған Сельмаш көпіріне де барды. Өткелдің екі жолағы пайдалануға берілген болатын. Алайда көлік жүргізушілері көпір тар деп шағымданды. Тіпті, екі көлік қатар келсе симай қалуы мүмкін. Мердігер мекеме "Қазақдорстрой" ЖШС. Жоба жетекшісі Шатбек Байсыновтың сөзінше, жоба бойынша бұл жол бір бағытқа ғана арналған. Көлік нөпірін азайту үшін екі бағытты жол ретінде уақытша ашылыпты. Жоба құрылысы толығымен 2020 жылдың шілдесінде аяқталуы тиіс. Көпірдің екінші бөлігі салынады. 6 жолдың торабы түйісетін көпір құрылысы күрделі. Көпір құрылысына қатысты шағымдар көлік жүргізушілерімен қатар қарапайым тұрғындардан да түскен еді. Көпір маңында орналасқан үйлерден жарықшақтар пайда бола бастаған. Көлік шуынан ұйқылары қашқандарын да айтқандар бар. Көпір астында орналасқан үйлердің жағдайы болашақта шешіледі деді қала әкімі. Құрылыс басталғаннан кейін тұрғындарға бәрін түсіндірдік деп сендірді Мавр Абдуллин. Көпір қалаға аса қажет болғандықтан кеңейтіліп жатыр. Облыс әкімі халық қауіпсіздігін сақтау үшін көпір жұмысын реттеуді тапсырды. Қауіпсіздікті сақтай алсаңдар осылай келесі шілдеге дейін көлік қозғалысы жалғаса берсін, болмаса жолды жоба бойынша бір бағытты қылыңдар деген тапсырма берді. Ол кезде екінші бағыт ашылғанша көліктердің жартысы Әуе қалашығы ауданындағы өткелмен жүреді. Көпір құрылысына 2 млрд 800 млн теңге қарастырылған.