Бүгін БАҚ қызметкерлері күні. Сондай-ақ, бірінші қалалық арна "Рика-ТВ" телеарнасына биыл 30 жыл. Ұжымымызды қос мерекемен облыс әкімі Оңдасын Оразалин мен қала басшысы Асхат Шахаров құттықтап келді. Аймақ басшысы Оңдасын Оразалин "Рика-ТВ телеарнасын құрған азаматтардың бірі. Бүгінгі мерекелік шарада арнаның құрылу тарихына көз жүгірткен облыс әкімі ұжымның бүгінгі жетістігін де атап өтті. Аймақ басшысы телеарна ұжымына ізгі тілегін білдіріп, картина табыстады. Сондай-ақ, бірқатар қызметкерлерді "Алғыс хаттармен" марапаттады. Асхат Шахаров та өз атынан қызметкерлерге "Алғыс хаттар" табыстады. Салтанатты жиынға арнамыздың ардагерлері де қатысып, марапатқа ие болды. 30 жылдан астам тарихы бар "Рика ТВ" ұжымының басшысы Наталья Бандровская аймақ басшысының мерейтоймен құттықтап келуі зор мәртебе екенін атап өтті. Облыс пен қала басшыларына ұжым атынан естелік сыйлықтар табыстап, алғысын білдірді. Қаланың алғашқы тәуелсіз телеарнасы "Рика ТВ" өз жұмысын 1991 жылдың 31 желтоқсанында бастады. Бүгінде бүтін бір медиа топқа айналған арнаның заманауи мамандандырылған өндірістік базасы бар. Ұжымда 100-ден астам қызметкер еңбек етеді. 30 жылда телеарна қазақ және орыс тілдеріндегі түрлі көңілді, танымдық және ақпараттық бағдарламаларымен көрермен көзайымына айналды.