Облыс әкімі Ералы Тоғжановтың кезекті жұмыс сапары Ойыл ауданында жалғасты. Аймақ басшысы ауданның әлеуметтік-экономикалық даму жағдайымен, мемлекеттік мекемелер жұмысымен және шаруалар жайымен танысты. Өңір басшысы "Ұлы Жібек" жолының бойындағы «Көкжар» жәрмеңкесінің 155 жылдық мерейтойына арналған салтанатты шараға қатысты. Ол мерекелік жиында сөз сөйлеп, тұрғындарды құттықтады. Одан бөлек, облыс әкімі Ойыл ауданына қарасты Саралжын ауылдық округінің Қоңырат елді мекенінде орналасқан «Тәжібай агро» жауапкершілігі шектеулі серіктестігінде болды. Серіктестік басшысы Абыл Сатаев асыл тұқымды мүйізді ірі қара өсірумен айналысады. Бүгінде кәсіпкердің өрісінде 500-ден астам ангус тұқымды сиыр бар. Репродукторлы шаруа қожалығын құру мақсатында 2020 жылы «Қарапайым заттар экономикасы» бағдарламасы аясында несие алып, 235 ангус тұқымды ірі қара малын сатып алған. 2021 жылы «Агробизнес» бағдарламасымен тағы несие алып малына тұяқ қосқан.Өңір басшысы Ойылдағы демеушінің көмегімен салынған аудандық музыка мектебіне де соқты. 1971 жылдан бастап жұмыс жасап келе жатқан музыка мектебінде қазір 500-ден астам бала білім алуда. Өнерпаздардың республикалық, облыстық деңгейдегі жетістіктері де жетерлік.Сапар барысында облыс әкімі ауласын табыс көзіне айналдырып, қысы-жазы ойылдықтарды көкөніспен қамтып отырған Сапура мен Мир Құлбаевтардың үйіне арнайы барды. Мемлекеттік бағдарламаның арқасында алғашында 6 пайызбен жеңілдетілген несие алған ауыл тұрғындары бүгінде ісі алға басқан шағын кәсіп иесіне айналған. Өткен жылы мемлекеттен қайтарымсыз грант ұтып алып, тағы екі жылыжай салып жатыр. Аймақ басшысы ауданға сапары соңында Ойыл мен Қараой ауылы арасын жалғайтын жолдағы орташа жөндеу жұмыстарын қарап шықты. Мердігердің алдына нақты міндеттер қойды. Жақын арада жауаптылар артылған міндетті орындаулары тиіс.