Кеше облыс әкімі Ералы Тоғжанов жұмыс сапарымен Байғанин ауданына барды. Аймақ басшысы Байғанин ауданының әлеуметтік-экономикалық дамуымен танысты. Аудан тұрғындарына мамандандырылған медициналық көмек көрсету үшін 100 орындық ауданаралық аурухана салу жоспарын қарап шықты. Қарауылкелді ауылында жылыжай кешенінің жұмысын көрді. Бүкіл аудан тұрғындарын көкөніспен қамтып отырған бір отбасының жұмысын көпке үлгі етті. Аудандағы өзге де әлеуметтік маңызы бар нысандарды қарап, шаруа қожалықтарындағы мал басын көбейтудің әдіс-тәсілдерімен танысты.Байғанин ауданы тұрғындарына үлгі болып отырған Құтым Қасеновтің жылыжайы атадан ұрпаққа қалатын кәсіп болғалы тұр. 80 жастағы қария өзінің жылыжайын сонау 1990 жылдары тұрғызған. 30 жылдан бері жылына екі рет өнім алады. Биылдың өзінде 5-6 тонна қияр алып отыр. Одан бөлек салат жапырағы, көкжуа, түрлі дәмдеуіш шөптерін өсіреді. Жылыжай өнімдері аудан, қаладағы дүкен сөрелеріне сатылымға түседі. Бағалары қолжетімді. Жылыжай кешені өнімдерінен дәм татқан өңір басшысы аудандағы тағы бір үлкен нысан "Эльбрус" шаруа қожалығына аялдады. 1100 бас жылқы өсіретін қожалық аудан тұрғындарын жұмыспен қамтып отыр. "Эльбрус" шаруа қожалығы ет өнімдерін экспортқа шығаруды көздейді. Шаруа қожалығында мал басын көбейту қазірден жолға қойылуда. Жылына әзірге 500 бас мал сатып алынады. Жылқылар сүтті, етті болып бөлінеді. Сондай-ақ, аймақ басшысы Байғанин ауданының әлеуметтік-экономикалық дамуымен танысты. 100 орындық ауданаралық аурухананың құрылысын қарап шықты.