Бүгін облыстық мәслихаттың кезектен тыс отыз төртінші сессиясы өтті. Халық қалаулылары облыс әкімі Оңдасын Оразалинмен бірге өңірдің бюджетін тағы бір рет пысықтады. Алдағы үш жылда аймаққа республикалық қазынадан 17 млрд теңге трансферт бөлінеді. 2019-2021 жылдарға арналған облыс бюджеті қомақты. Басым қаражат мемлекеттік қызметкерлердің жалақысына бағытталмақ. Күн тәртібінде «2018 жылғы облыстық бюджеттің атқарылуы туралы есебі» тыңдалды. Облыстың қаржы басқармасының басшысы Гүлназ Сисенова баяндамасында түсімдер бойынша облыстық бюджет жыл ішінде 13 млрд. 535 млн.теңгеге ұлғайғанын нақтылады. Республикалық қазынадан 17 млрд теңгеге нысаналы трансферт бөлінген. Мол қаржы білім беру, денсаулық сақтау нысандарын салуға және қайта жаңартуға, инженерлік-коммуникациялық инфрақұрылымды жобалауға, вакциналарды және басқа да иммундық-биологиялық препараттарды сатып алуға, жылу-энергетика жүйесін дамыту, нәтижелі жұмыспен қамтуды және жаппай кәсіпкерлікті дамытуға жұмсалды. Млрд-тардың біраз бөлігі игерілмеген. Сессияда сондай-ақ, «2018 жылғы облыстық бюджеттің атқарылуын бақылау нәтижелері бойынша» облыстық тексеру комиссиясының төрағасы Сағат Еңсегенұлының есебі тыңдалды. Тексеру комиссиясы мемлекеттік органдарда бюджет қаражаттарын тиімсіз пайдалану, бюджеттік бағдарламаларды толық игермеу, қаржыны тиімсіз жоспарлау көрсеткіштерін анықтаған. Аталған мәселелер бойынша қорытынды жасаған облыстық мәслихаттың бюджет, экономика, өнеркәсіп және кәсіпкерлік жөніндегі тұрақты комиссиясының төрағасы Аркадий Ни өңір экономикасын дамыту үшін бөлінген қаржыны шашауын шығармай жұмсау қажет деп ескертті. Депутаттар Хромтау қаласында 320 орындық балабақша, "Мұз сарайын" салу жоспарын қабылдады. Қосымша әлеуметтік 18 мәселе қаралып, шешімін таппады.