Кеше елде "Дұрыс тамақтану-үздік білім алудың жолы!" ұранымен онкүндік басталды. "Денсаулық" мемлекеттік бағдарламасы шеңберінде жүзеге асып жатыр. Осыған орай бүгін облыс әкімдігінде облыстық денсаулық сақтау, облыстық қоғамдық денсаулық сақтау, білім басқармалары мамандарының басын қосқан жиын өтті. Онда мектептердегі асханалардың жайы, оқушыларды құнарлы аспен қамту, дұрыс тамақтанбаудың зияны сөз болды. Әлі күнге дейін мектептердегі асханалар жұмысы біріздендірілмей келеді. Оған жыл сайынғы тексерулер дәлел. Өңірде 395 мектеп бар. Соның 376-да оқушылары ыстық тамақпен қамтылған. Жалпы 141 мың 137 оқушының 16 мың 108-і мектептерінде тегін тамақтанады. Барлық мектептердегідей №51-ші гимназияда асхана жеке кәсіпкерге жалға берілген. Кәсіпкерлер байқауға қатысып, тендерді ұтып алады. Бұл мектепте байқау соңғы рет 2016-шы жылы өткен. Екі аптаға арналатын ас мәзірі білім бөлімінен жолданып тұрады. Гимназияның өз шайханасы бар деп айтуға болады. 2003-2004-ші оқу жылында пайдалануға берілгелі мектепте "Жасыл дәріхана" үйірмесі жұмыс жасайды. Биология пәні мұғалімдері балаларға өлкемізде өсетін дәрілік шөптерді таныстыра отырып, оларды фитошай көмегімен денсаулықтарын түзеуге машықтандырған. Енді мектепте аптасына 2 мәрте бүтін ұжым оқушылармен қоса дәрілік шөптерден жасалған шай ішеді. Әрине, биологтар фитошай процедурасын дәрігерлермен ақылдаса отырып жүргізеді. Бүгінге дейін денсаулықтарындағы ерекшеліктерге байланысты қай оқушының қандай шай ішетінін Дәметкен ұстаз біліп алған. Тек мектепте ғана емес, ата-ана баласының дұрыс тамақтануын үнемі қадағалап отырғаны абзал. Өйткені дәрігерлер бүгін бөліскен статистикалық мәліметтер көңіл көншітпейді. Былтыр 19 мың 327 бала және 9 мың 103 жасөспірім асқазан-ішек ауруларына алғаш шағымданып, ауруханаларға қаралған. Басты мәселе, әрине семіздік. Облыста қазір 295 оқушы осы диагнозбен есепте тұр. Ал жедел гастритке облыста әр жүзінші бала, әр 32-ші жасөспірім шалдыққан.