Бүгін елде мектептер оқушыға толды. Оқу жылының аяқталуына 14-ақ күн қалғанда оқушылар мектепке барды. Ата-ана да, оқушы да аң- таң. Қош, шаһардағы жалпы білім беретін орта мектептер ертемен дәстүрлі форматта оқытуды бастады. Мектепке келген оқушылар арнайы сызылған ара қашықтық белгісінде тұрып, қолын залалсыздандырып алған соң, ғимаратқа енді. Бір сыныпта 25 оқушының отыруына рұқсат етілген. Бір жарым жылдан аса мектебіне жете алмаған оқушылар бүгін дәстүрлі оқып қайтты. Әсіресе 6-шы, 10-шы сынып аралығындағы оқушылар мәз. Көбірек үйде болған осы сыныптың оқушылары. №71 жалпы білім беретін орта мектепте 1442 оқушы білім алады. 53 сынып бар. Жаңа ақпарат тараған соң үш күн ішінде ата-аналар тарапынан өтініш қабылданған. Абырой болғанда, еш ата-ана қарсылық танытпаған. Алдағы тоғыз күн бойы екі ауысымда барлық оқушылар сабақтарының 70 %-ын мектепке келіп оқитын болады. Сыныптастарымен қайта қауышқан оқушылар мәз-майрам. Балалар партаны сағынғандарын айтады. Бір сабақ 40 минутқа созылады. Күніге 5-6 сабақтан болады. Әр сабақ аралығында 15 минут бойы ылғалды тазалық жұмысы жасалады. Мектеп дәрігері оқушылардың денсаулығын бақылап отырады. Айта кетелік, 26-шы мамыр 19-шы маусым аралығында жазғы мектеп жүйесі жұмыс істейді. Ата-аналар егерде қаласа, баласын үлгерімі нашар болған сабақтарының тізімін жазып, мектепке жіберуіне болады.