Өткен демалыс күндері "Оңтүстік айналма жолы" жартылай пайдалануға берілді. Жөндеу жұмыстары бақандай үш жылға созылған күре жолдың әзірге екі жолағы ғана жөнделіп біткен. Жол құрылысын қарап көрген өңір басшысы Ералы Тоғжанов төрт жолақты жолдың қалған бөлігіндегі жұмысты да ертерек аяқтауды тапсырды. 2,9 шақырым болатын қос жолақта қазір көліктер қатынасы жанданған. 41-ші бекет, Ясный елді мекендеріне бағыт алған көліктер "Оңтүстік айналма жолына" кедергісіз түсіп жатыр. Сәйкесінше көлік кептелісі сейілген. "Оңтүстік айналма жолының" құрылысы бақандай үш жылға созылды. 41-ші бекет пен Ясный елді мекенінің тұрғындары ұзақ жылдар бойы жол азабын тартып келгені рас. Бүгінде тілектері орындалып, күре жолда құрылыс толық аяқталмаса да, жартылай пайдалануға беріліп отыр. Бұл ауыспалы жоба. Жолдағы қалған құрылыс жұмыстары келер жылы аяқталады. Салқын түскенше мердігер жолдың негізін салып бітуге уәдесін берген. Сондықтан жолдың екінші бөлігінде жұмыс қызу жүруде. Құрылысты "Ерхат жолдары" ЖШС-гі жүргізіп жатыр.