Шанхай ауданындағы Олег Кошевой көшесінің тұрғындары жұртта қалғандай күй кешіп жатыр. "Олег Кошевой көшесінде тұрғаныма 33 жыл болды. Осы уақыт ішінде жолы бірде бір рет жаңартылып көрген жоқ", дейді Аққатша Тәжияқова. Көктем мен күзде суды белшесінен кешіп жүретін тұрғындар үшін аялдамаға жету мұң. Немерелерін мектепке резеңке етікпен таситын зейнеткер билік бізге де мойын бұрса дейді. Кеңес Одағы батырының есімі берілген көшенің былтыр жарты бөлігі ғана жөнделген. Тұрғындар ой-шұңқырлардан көліктеріміз жарақсыз болып қалып жатыр деп шағынды. Ал, қалалық тұрғын үй коммуналдық шаруашылығы бөлімі мамандарының айтуынша, жол жөндеушілер бұл көшеге жақын уақыттары келе қоймады. Олег Кошевой көшесінде тұратындардың мәселері мұнымен бітпейді. №113, 115- үйлердің аулаларында көліктен аяқ алып жүру мүмкін емес. Балалардың ойын алаңы да автотұраққа айналған. Былтыр тұрғындар өз қалталарынан қаражат шығарып, ойын алаңы мен аулаға кіре берісті қоршатқан. Алайда, қоршау сынып-қираған. Бұл кісілер тұрғын үйдің жертөлесіне толған кәріз суынан да құтыла алмай отыр. Осының салдарынан жаз бойы маса мен шыбын-шіркейге таланамыз деп шамданды. Ал, осыдан екі жыл бұрын тұрғын үй жанына орналастырылған 12 қоқыс жәшігінің биыл тек екеуі ғана қалған. Мамандар бұл мәселелердің барлығына тұрғын үйдің коммуналдық мекеме басшысы жауапты деп отыр. Ал, О.Кошевой көшесіндегі №113,115 үйлер қарайтын "Арайлым" ПИК төрайымы Бибігүл Омарова жұмыс орнында болмады. Алайда, орнында отырған кассир барлық мәселеге тұрғындардың өздерін кінәлады.115 пәтері бар екі үйдің тұрғындары бастарындағы мәселелерін айтып, талай табалдырықты тоздырған. Қалалық әкімшілік пен "Нұр Отан" партиясынан да көмек сұраған жандарға әзірге ешкімнен қайыр болмай тұр.