Әлеуметтік желіде жуырда ұялы телефонға түсірілген мынадай бейне кадрлар пайда болды. Видеода №52 қоғамдық көлікке сыймаған халықты автобустың толғанына қарамастан кондуктор итеріп кіргізіп жатыр. Тіпті, оған аялдамада автобус күтіп тұрған өзге тұрғындар да көмекке келген. Желіге жарияланған бейнежазбаға тұрғындар біраз пікір білдірген. Әзіл-қалжыңмен болса да шындықты айтқандар көп. "Барлығы 80 теңге үшін" дейді олар. Кешқұрым жұмысынан үйіне асыққан тұрғындар көліктен қалғылары жоқ, әрине. Дегенмен, салонға нормадан артық адам тиеген жүргізуші мен кондуктордың ісі заңды ма? Мәселеге қатысты бүгін қалалық жолаушылар автокөлігі кәсіпорынының басшысы жауап берді. Жолаушының қауіпсіздігін екінші орынға қойғандар уақытша жұмыстан шеттетілген. №52 бағытындағы көліктердің кеше үшеуі сынып, бір күнде халықты әбігерге салды. Тұрғындар мұндай жағдай жиі болады дейді. Жолақысы 80 теңгеге көтерілгелі бері ақтөбеліктер қоғамдық көліктердегі қызметтің сапасына аса мән береді. Алайда, қызмет сапасы әлі көңілдерінен толық шықпай отыр. Қалалық жолаушылар автокөлігі кәсіпорнына қарасты №52, 51, 2 автобустар "Нұр Ақтөбе" ауданына қатынайды. Кешеден бері бағыттары өзгерген. Ерлан Блиевтің сөзінше, 3 бағыттағы көліктердің қозғалыс ара қашықтықтары 10-15 минут. Әр бағытқа шамамен 10-12 автобус қатынайды. Қазір жолаушылар тасымалына жауапты мекемеде 199 автобус 24 бағыт бойынша халыққа қызмет көрсетеді.