Кедергісіз қозғалыс! Бүгін "Пандус-Ок" компаниясының басшысы Шахан Жолдасбаев шаһарға жеткізілген су жаңа қоғамдық көліктердің мүмкіндігі шектелген ақтөбеліктердің қолданысына жарамдылығын тексеріп көрді. Бірнеше сағатқа созылған акцияға қала әкімі Асхат Шахаров та қатысты. Тестілеуден алдымен "Қала Транс" ЖШС-гі бүгін ғана іске қосқан №20 бағыттағы автобустар өтті. Қоғамдық көлікте мүгедек жандарға арналған дыбыстық тетіктердің бар-жоғына баса назар аударылды. Қоғамдық көліктер мүгедектердің жүріп-тұруына арналмаған. Бір ай бұрын ғана сатып алынған автобустар мүмкіндігі шектеулі жандардың көңілінен шықпады. Олар бірде-бір қоғамдық көлікте аялдаманың аты жазылған жүгіртпе немесе дыбысты хабарлама жоқ дейді. Бұл саңыраулар мен көзі нашар көретіндер үшін қиын. Ал қол арбаға таңылғандардың мәселесі тіптен ушығып тұр. Қоғамдық көлікпен бір жарымжан еміне, бірі жұмысына қатынайды. Алайда, шаһардағы жаңа автобустар қол арбамен мініп-түсуге ыңғайсыз. Мәселен, І- топ мүгедегі Шахан Жолдасбаев қанша талпынса да, мына автобусқа өздігінен міне алмады. Мүгедектердің өкпе-ренішін қалабасы тыңдады. "Пандус-Ок" компаниясының басшысы Шахан Жолдасбаев мүгедек азаматтарды қолдау қорының мүшелерінің ұсынысын акцияны пайдалана отырып тағы бір рет шаһар басшысына құлаққағыс етті. Асхат Шахаров арнайы рейдтік тексеруді бастап, мониторинг жүргізуге уәде етті. Кемшіліктерді жою үшін жалғыз қоғамдық көлікте емес, әлеуметтік нысандарда, тұрғынжайларда мүмкіндігі шектелген азаматтарға қолайлы орта қалыптастыру қажет деді. Анықталған кемшіліктерді жолаушылар тасымалымен айналысатын жаңа мекеме "Қала Транс" ЖШС-гі тез арада жоюға мүдделі. Бірақ, автобустарды мүгедектерге бейімдеудің қанша уақытқа созылатындығы беймәлім. 10 мыңнан астам мүгедек тұратын шаһарда инватакси де жеткіліксіз.