Өткен жыл қала үшін табысты жыл болды. Инфрақұрылым дамып, барлығы 53 нысан қолданысқа берілген. Қаланы көгалдандыру мен абаттандыру жұмыстары қарқынды жүргізілді. Бұл туралы бүгін, қала әкімінің бірінші орынбасары Жандос Байырханов мәлімдеді. Биыл Тұңғыш Президент атындағы саябақта "Ғашықтар аллеясы" мен балалар қалашығы салынады. 500 адамға шақталған балалар шығармашылығы орталығы мен облыстық тарихи-өлкетану музейінің құрылысы басталды. Алайда, мектеп пен балабақша жетіспеушілігі мәселесі әлі де бар. Ел тәуелсіздігінің 25 жылдығына орай қаладағы ескі көше атауларына Алаш зиялыларының есімдері берілді. Олар-Мәскеу, Құрмыш, Тұрғындар қалашығында орналасқан көшелер. Көктем мен күзде саз-балшыққа бататын бұл көшелерге жөндеу жұмыстары әзір жүргізілмейді. Тек қоғамдық көлік өтетіндері ғана жоспарға енгізілген. 2016 жылы барлығы 738 мың шаршы метр баспана пайдалануға берілді. Бұл 40 көп қабатты үй. Үшеуі "Тұрғын үй құрылыс жинақ банкі" арқылы, 37-сі "Қазақстан ипотекалық компаниясы" мен "Бәйтерек девелопмент" АҚ-ның коммерциялық баспаналары. Биыл 1278 ақтөбелік қоныс тойын тойлайды деп жоспарланып отыр. Былтыр Ақтөбеде бес білім беру мекемесі қолданысқа берілді. Олардың үшеуі мектеп, екеуі балабақша. Сазды ауылы, Батыс-2 ауданы мен К.Нокин ауылында салынып жатқан мектептердің құрылысы аяқталуға жақын. Сондай-ақ, Сүт зауыты, Авиатор, Болашақ аудандары мен Ясный-2, Жаңақоныс ауылдарында мектептер салынбақ. "Нұр Ақтөбе" қалашығындағы №2-ші ықшам аудан құрылысы аяқталды. Алдағы уақытта мұнда тағы да 8 ықшам аудан пайда болады.