17 жастағы ақтөбелік Нұрасхан Тынымжанов 10-15 жылға сотталуы мүмкін. Оған 15 жастағы жасөспірім қызбен жыныстық қатынасқа түсті деген айып тағылып жатыр. Ұлдың анасы айыппен келіспейді. Ол бүгін мәлімдеме жасады. Анар Қошанованың төрт баласы бар. Барлығы әлі кәмелеттік жасқа толмаған. Көпбалалы ананың тұңғышы егіз ұлдар. Егіздің сыңары Нұрасхан Тынымжанов қаладағы колледждердің бірінде электрик мамандығында 2-ші курста оқиды. Анығын айтқанда, оқитын еді. Қазір жасөспірім тергеу изоляторында отыр. 15 жасқа енді толған қыз баламен қарым-қатынасқа түскен ұлдың үстінен қазір ҚР ҚК 122- бабының 3-ші тармағы, яғни "16 жасқа толмаған адаммен жыныстық қатынаста болу немесе нәпсіқұмарлық сипаттағы өзге де әрекеттер" бабы бойынша іс қозғалуда. Әуелде полиция бөлімдерінің бірінде жауап алынған. Жасөспірім айға жуық №5 қалалық тергеу изоляторында қамауда. Ұлының болашағына алаңдайтын ана баласымен талай мәрте сөйлескенін айтады. Тіпті үйіне келгіштеп кеткне қызбен ашық сөйлескен. Қыздың анасына да ескерту жасаған. Онымен балалар ата-аналарының айтқандарына құлақ аспаған. Ақыры екі жақ қыз 16 жасқа толған соң келесі жылы оларды үйлендіреміз деп шешкен. Алайда соңғы болған оқиға бұл жоспардың быт-шытын шығарды. Кезекті рет үйіне қонбаған қызына ашуланған анасы сот-медициналық сараптама жасатуға өтініш білдірген. Бірақ сотқа шағым түсірмеген. Нұрасхан Тынымжановтың анасының айтуынша, ұлы әділетсіз түрде қамауға алынған. Себебі елімізде бұл бап бойынша педофилдерді ғана соттайды. Ал 17 жасқа енді толған оның ұлы заң рұқсат берсе, дәл бүгін қызбен отау құруға дайын. Тіпті, Анар Қошанова қыз баланы үйіне келін қылып, түсіріп қоюға оқталған. Бірақ, бұл да заңға қайшы әрекет болып саналатындықтан, бас тартқан. Енді жасөспірімдердің машақатқа толы махаббат хикаясы қалай жалғасатыны белгісіз. Соталды тергеу амалдары жүргізілуде.