Бүгіннен бастап қаладағы барлық мешіттерде жұма намазы қысқартылған үлгіде оқылады. Әдетте бірнеше сағатқа созылатын діни жиын тәртібі коронавирустың алдын алу шараларына байланысты өзгерді. Облыстық "Нұр ғасыр" орталық мешітінің наиб-имамы Нұрлыбек Күзембаевтың айтуынша, көпшілікпен өтетін ас-садақа мен жиындар, іс-шаралар мүмкіндігінше кейінге шегеріледі. Ал жамағатпен оқылатын бес уақыт намазға қатысқан жағдайда құлшылықтан кейін қол беріп амандасудан, бір орынға жиналып дұға етуден сақтану қажет. Сондай-ақ, бүгіннен бастап шаһардағы барлық мешіттерде жамағатқа көп шоғырлануға мүлде болмайды. Әдетте 3 мың адам жиналатын жұма намазының уақыты шектелді. Келесі аптадан бастап жұма жиынында уағыз айтылмайды, ұзақ сүрелер оқылмайды. Намаз оқып болған соң қол алысуға да рұқсат етілмейді. Мешіттерге қарт кісілер мен балиғат жасына толмаған жеткіншектерді жетектеп келуге рұқсат жоқ. Әйел адамдарға да жиі келуге тыйым салынады. Сауат ашу курсының жұмысы тоқтады. Шелпек пісіріп әкелуге де болмайды. Мешітке келерде бетперде киіп келу, үйден жуынып келу құпталады. Дегенмен тахараты бұзылған пенделерге дәрет алуға болады. Намаз оқылып болған соң көп кідірмей мешіттен шығуға кеңес беріледі. Әрбір жұма намаздарынан соң мешіттерді тазалау жұмыстары жүргізіледі. Мұсылман дініндегі басты шарт тазалық болғандықтан мешіттерді сүртіп-тазалау күн сайын жүріп жатыр. Тазалық жұмыстарына мешіт қызметкерлері жұмылдырылады. Күрделі санитарлық тазалық жұмыстары жуыну бөлмелері мен асханада, және мешіттің ішінде ай сайын арнайы мамандардың көмегімен жасалады.