Қыркүйек айында Әйтеке би ауданының Қарашатау ауылында хоккей аренасының құрылысы басталуы мүмкін. Және Ырғыз ауданында футбол алаңы салынады. Бұл жастардың "Жаса" жобасына ұсынған идеялары. Қағаз жүзінде пысықталып тұрған жобалар іріктеу турынан өткен. Бүгін бірінші айналымда ұсынған жобаларын сенімді түрде қорғай алған 46 өтініш иесі Сақтаған Бәйішев атындағы облыстық ғылыми әмбебап кітапханасының білім орталығында кездесіп, өзара тәжірибе алмасты. Жұмыстар арасында тың идеялар көп. Мәселен Батыс-2 ауданындағы "Денсаулық" саябағына ақылды смарт- үстелдер орнату, жаттығу тренажерлерін қою бастамалары бар. Бұл болашақ дәрігерлер Найзабек Ержігітов пен Қайыржан Мәмбетовтердің ұсыныстары. Ал жобаның ең жас қатысушылары - Ясный ауылы орта мектебінің оқушылары тапсырған жұмыс жоғары бағаланды. Мектеп оқушылары ерекше ойын түрін ұсынып отыр. Шілде айынан бері өтіп жатқан "Жаса" жобасына шамамен 100-ге жуық өтініш түскен. Оған қаламен қатар барлық аудандардан 14 пен 28 жас аралығындағы жастар белсене қатысқан. Әсіресе Шалқар ауданының жастары мықты идеялар ұсынған. Енді екінші турға шыққан 46 жұмыс тағы іріктелмек. Үздік жоба Нұр-Сұлтан қаласына жол тартады. Республика көлемінде жеңіске жеткен жоба иесіне қыркүйек айынан бастап жеке есепшотына қаржы аударылады.