Өңірде карантиндік шектеу шаралары бүгіннен бастап біршама жеңілдетілді. Аймақтың "сары" деңгейге өтуіне байланысты облыстың бас мемлекеттік санитар дәрігері қабылдаған қаулысына сәйкес алдағы мереке күндері базар, сауда үйлері, құрылыс материалдарын сататын ірі дүкендер жұмыс істейді. "Ашық" қосымшасына енген жабық нысандарға да адам санын шектеп қызмет көрсетуге рұқсат берілген. Сондай-ақ, төрт күндік мерекеде қала тұрғындарының жаппай егілуіне жағдай жасалатын болады. Өткен тәулікте 86 ақтөбеліктің ағзасынан коронавирус анықталды. Өкініштісі 74 адам симптомды түрімен сырқаттанып жатыр. Арасында бес бала бар. Науқастардың барлығы ауруханаларда ем қабылдауда. Тағы 11 адамның өкпесі қабынған. Аймақ апта бойы "сары" деңгейде тұрақтағандықтан, бүгіннен бастап карантиндік шектеулер біршама жеңілдетілді. Алдағы төрт күнде шаһардағы біршама нысандар жұмысын жалғастырады. Бұл тізімге базарлар мен сауда үйлері, құрылыс бұйымдарын сататын ірі дүкендер, "Ашық" қосымшасына өткен көңіл көтеру орындары мен караоке, барлар, банкет залдары, фитнес клубтар қызметі кіреді. Вакцина салатын жылжымалы көліктер әзірге қаланың алты бөлігіне қойылған. Бұл орындарда 13 сағат бойы тегін екпе салдыруға болады. Наурыз айынан бері 58 мың ақтөбелік екпе қабылдап үлгерген. Екі компоненті 19 мың 75 адамға егілді. 11 зертханада 530 мың 371 ПТР-тесті жасалған.